مازال للأحلام متسعا
اتململ السلطان ف نص الليل
وبان علي وشه الكدر
قال الوصيف
علي جناح السرعة هاتوا المضحك
جريوا العبيد في القصر
وبأعلي صوت نادوا
يا مضحك السلطان
اظهر وبان
لك الأمان والجايزة والإحسان
لكن ما حدش رد
غير صوت غريب قال لهم
مين راح يضحك عظمة السلطان
إذا كان مهرج البلاط
من يوم ما عاد من جولته في المدينة
أقواله صبحت حزينه
اتحير السلطان في أمر خطير
فكر كتير
لكنه برضك ما اهتداش للحل
قال الوصيف
علي جناح السرعة هاتو الحكيم
جريوا العبيد في القصر
وبأعلي صوت نادوا
قوم يا حكيم الزمان
لحضرة السلطان
لكن محدش رد
غير صوت غريب قال لهم
مين راح يلقن للملك حكمته
إذا كان حكيم القصر
لما اتجاهلتوا رموزه ومسائله
اختل عقله
اتهدد السلطان قوي وانزعج
لما علم
ان العدو قاصد الديار
قال الوصيف
علي جناح السرعة هاتوا القائد
جريوا العبيد في القصر
وبأعلي صوت نادوا
يا قاهر الأعداء
اركب قوام علي فرسك المشهور
واحضر بسيفك
لكن ما حدش رد
غير صوت غريب قال لهم
ومين كمان ح يحارب الأعداء
إذا كان أمير الجيوش
بعد النعيم والحاشية من حواليه
بقي يشوف الدم يغمي عليه !!
!!!!!
حرقت للشعر من لحم البدن قربان
وجيت بسن القلم وغرزته في الشريان
ورسمت بالدم ما بين السطور بركان
وسهرت والخلق نايمه في الليالي السود
أعاني خلف المعاني والعصب مشدود
لحد ما صغت ترنيمه في حب الناس
ولما حطيتها قدامهم بشوق وحماس
ما خدوش في بالهم وأفضلهم قرا العنوان
النفس طائر والمدي محدود
والشوق معوق .. في طريق مسدود .
وورد خد الحب زاوي العود .
هل دي نهاية المطاف
ولا السنين العجاف ؟!
لو كان لي باقي ف عمري أشوف السمان
وأمرح ولو أيام في حضن الأمان
وأتذكر الحاضر كابوس هذيان
كنت ... ياحمل الجبل
تصبح خفيف بالأمل !!
لكن دا حلم يخالف الأحلام
بشوفه ونا نايم ومن غير ما انام
وصاحي صورته ف الخيال ع الدوام
لكن حلوله سد
وبدون بقر يتعد!!
عدد السنين بقي خارج الحسابات
والمرموزين ما بقوش سبع بقرات
لكنهم قبضه من الذرات
وشئ طويل الأمد
فوق الحساب والعدد !!
ياللي بعثت الرحمه نور انتشر
وتركت ما بينا الشيطان ينحشر
وصنعتنا حسب اختيارك بشر
اغفر خطايا الأنام
واجعلها أضغاث منام !!
بحر الكلام واسع وماله شطوط
أقله صح وأكتره مغلوط
وما فيش رقيب ع اللسان
واحنا اختلفنا ف الحروف والجمل
مين مننا الغلطان ؟!!
لو المناقشه تسير ف درب النزاهه
وتلغي منها شبهة المصلحه
ما نلتقيناش كل مره ف متاهه
كل المناقشات هذه الأيام
أبطالها فرسان كلام
اللي بدون ما يرمشوا يكذبوا
واللي بدون احترام
قلبوا الحقيقه وخلوا حتي المنطق
عند الغرايز يشتغل خدام !
بيني وبينك شبر
بيني وبينك قدم
لكن لقانا محال
بيني وبينك كبر
بيني وبينك ندم
بيني وبينك انشغال بال
واختلاف وجهات نظر
لا تحسبي المسافات بالأميال
دا ياما من مسافات فلكيه
قطعها ضوء النجم ف ثواني
ولكن المسافه المحاله مهما كان قصرها
هيا اللي تبقي مش ف إمكاني !
العصر دا عصر الزواق والشكل
اللي بلا مضمون
رضع ولاده كل قناعاته
وحط فوقهم راياته
وكل شئ محسوب وله مواصفاته
من السلع للفكر والنزعات
حتي مرادفات العواطف
من شوق ولهفه ورغبه وتنهدات
متصنعه ومتغلفه في بورصة السندات !
رافض أنا فكرك وذوقك
ولهفتك ع الأبهه والجاه
وفكرتك عن الحياه
فهل يعوض دا حب الجسد
شئ مستحيل
الحب ما يصمد ويبقي له ذكر
إلا إذا كان بالجسد والفكر !
مافيش صباح ولا رباح
اتحاشوا جوه ضيق المخ واهجروا البراح
وكل شخص يحذر المزاح
وبعد نوبة العشا
يعمم النواح !
ممنوع بتاتا خفق أي قلب بنت أو ولد
واللا ح اجعلها علي روس الجميع هدد
والمشي ف الطريق مع الحريم جريمه
وكل من تخرج لوحدها أثيمه زنيمه
يقفل عليها جوزها أو أبوها ألف باب
لأنه هوه اللي ح ينسأل
يوم الحساب !
تتلم كافة الكتب ف كل أفرع العلوم
وأغلب الكتب ف الفلسفه
يا تدلقوها بالمراكب خارج البوغاز
يا تحرقوها بجاز !
تنسك كل دار لعرض سيما أو مسارح ...
واتعلموا إن الموسيقي والغنا حرام
وكل مخترع شيطاني أجنبي
خطر علي الأفهام
كمثل تلفاز وللا فيديو ولا راديوهات
كل الحاجات دي موبقات
وح تبقي ممنوعات !
يطول الرجال دقونهم
ويلبسوا ملابس السلف
ويفرش الأسفلت بالرمال
علشان ما كانش فيه زمان أتومبيلات
وكلكم ح تركبوا الجمال !
!!!!!
رد البيبان في وجه من عزآك .
واغرق لوحدك ف الألم والسكات
لا الخلق راح تدري بما جوآك
ولا العزا تقدر عليه كلمات
واهرب بحزنك بعيد
وانظم لروحك عديد
وقعه شديد وجديد
وأمر من حزن ثكلي
فقدت وليدها الوحيد
كان الأمل مرسوم علي النني
وكانت الأحلام وساد النعيم
لكنه خاب من غير خطأ مني
وصار ميراثي من حصاد الهشيم
آه يا زمن خوآن
تجزي كما الشيطان
النبل بالخسران
وتحابي أمثالك
ع الشر ... بالإحسان !
لا تندهش لدناءة الأيام
واشرب كاسات خذلانك المترعه
الحظ ضربه بتنضرب ف الظلام
ومش ف بالها اللي تعب أو سعي
ويا روح يا متكدره
اتجرعي ما جري
ويا حسره متحضره
شدي نياط القلب
وافريها بالمبشره !
يا اللي رفعت القامة عند السحاب
مش من مقامك تصطلح والزمان
ما كانش حقك تنخدع بالسراب
ولا كان يجب تصديق وعود الجبان
يا شمس وهمي وكدبي
خلف الضباب استخبي
ومحال يا نفسي تقبي
من ليل قرار الكآبه
علي شهيد وهم قلبي !!
لا ينقهر قلبك ولا تتغاظ
كمل طريقك وانفض الأحزان
لا الرمل يطفي لمعة الألماظ
ولا الرياح تخمد نيران بركان
ياخطوتي الشاسعة
في دنيتي الواسعة
يا بخت من يسعي
ف الحر واللسعة
ومن تجاربه يلقن الحفاظ
لب الحكم ألحان وسحر بيان
يا من مشي لقدام بدفع الضمير
لا تنشغل باللي بيجروا لورا
جهدك طلع ف الشمس أزهر منير
بغز عين اللي جحد وافتري
يا قسمة العادلين
مين ... كف ... ذاته ومين
فرد إديه لتنين
ومين مشي بوشين
ف الوش يهدي المدح بالقنطار
وف القفا غدارة متعمره !
كيف تندهش م اللي ف قلبه دفن
وانت اللي عارف طبع طين اللئام
الندل ينسج من دناوته كفن
وتحفظ العفه حياة العظام
خانك صديق غادر
شئ عادي مش نادر
والمجرم السادر
بالشر لو بادر
كيف يدهشك باللي حواه من عفن
وأنت اللي عارف إنه بعض الأنام !
راح تفضلي ياعفه تاج الفحوله
وح تلتفع بالاحترام يا شرف
مهما الخوارج فبركوا من مقوله
ومهما غرقوا ف الهوان والترف
وما يدرك الغافل
في مجلسه الحافل
إن الطريق قافل
والمنحدر سافل
ويا إما ذكري تستحث البطولة
ويا إما ذكري تستثير القرف !!
صحيت ف غبشة الشروق
أنطور الحروف علي الورق بلا نظام
وأعود ألمها
لعل بالعفوية تصدف كلمة لها معني يتقري
اتكونت لي بالصدف كلمة ... حرام ...
مين اللي يستجري بقوله يطرق المناطق المحرمة ؟!
حكمت عقلي وانتبهت للحروف
خطيت سطور متوافقة ويا المجتمع
لكنها متخاصمة ويا الشعر !
إذن لا مفر مكتوب علي الولي يجابه الخطر
دون اقتحامي ساحة المحظور ح تنتفي الدرر !
دونت كل ما بدالي وانتظرت خشبة الصليب
وفرقة الحرس
حطوني بالمقلوب علي حمار وجلجلوا الجرس
بكت علي مصيري صحبتي وقهقه العدو الخسيس
لكني كنت ف قمة انتشاء الصوفي لحظة الشهود
من متعة التجريس !
منه إليه
خلقنا م العدم وحث خطونا ف طريقنا طريقنا ليه
لو كان يخالف ما رأيت
ما كانش ثبت في ضميري أنبل الأفكار
وأعدني لأكبر الأخطار
قالوا اعترف برفضه سنة القطيع
أيوه اعترف
واللي ف عرفكوا العليل زرايه واحتقار
أراه ف عرف الحق ذروة الشرف
!!!!
شفت الخداع قال موعظه ع المنبر
والكذبه ماشيه لابسه تشريفه
نفر البرئ نفرة غزال العنبر
واتكأكأوا الجرابيع علي الجيفه
الكذب لعلع علي من أعطي
والندل كافأوه بالدهب والماس
والزيف لقي بين الضلال طمئنه
واتباعت الحكمه بعمله نحاس
اللي أخد بدوه علي من أعطي
واللي عطي قضي الحياه شحات
ومشاعر العشاق تعلي وتوطي
حسب ظروف البورصه والسندات
اتخاصم الابداع مع المواويل
والغنوه صارت مثل البيض انسلق
والحسبه باظت لما جزء ضئيل
قدر ينام ... والأغلبية ف قلق
صحاري طاهرة والمداين درس
وزحمة مشهد من عذاب الجحيم
ما حد كان أمن في وسط الونس
واتقدم الطوفان يهد السدود
ويفجع النايمين ف وهم الأمان
واتختمت القصه بقصف الرعود
وتناثر الأفلاك وموت الزمان
أدليت بهذا ... بعد آخر علامه
كانت لآخر يوم ف عمر السنين
ف الساعه اللي مخصصه للقيامه
وهيا ديا الخمسه والعشرين
ملعون أبوك يا حرص يابن الجبان
ملعون أبوك يابخل يادنيه
دا مافيش جيوب يا خلق ف الأكفان
ولا ف القبور خزنه حديديه !
ملعون أبوها عيشه ويا زمن
من سلو أهله تخاف ولا تختشيش
فيه الكريم والشهم مثله كمن
مشي ف طريق اللي يروح ما يجيش !
ملعون أبو اللي الشهوه والمال عموهم
والداهسين الناس بدون اكتراث
واللي بيغتالوا أمهم وأبوهم
لأنهم مستعجلين الميراث !
واللي عيونهم من قزاز بارد
واستبدلوا قلوبهم بطوب وحجاره
امتلكم الصادر والوارد
وربحهم بيجي علينا خساره !
ملعون أبو اللي عزمهم ف الحناجر
واللي مضوا المواثيق مع الشيطان
واللي يقوموا بعد لهط الأناجر
يجلجلوا بأصوات ترج المكان !
ملعون أبو كل اللي ف الشر ساهم
ملعون أبو كل اللي بيتهم قزاز
ملعون أبو اللي يبيع كرامته بدراهم
أو أي عمله فيها ريحة جاز !
ملعون أبو اللي اتنكروا للوطن
واشتغلوا عند المليونيرات توابع
هانو ... وما كنزوا خلاف العطن
واللي تجيبه الريح ح تاخده الزوابع !
واللي يشعوذ بالنصوص القديمة
واللي برز م الشق كالتعبان
واللي رقص م الفرحة يوم الهزيمة
واللي بكي من قلبه ع الريان !
مليون نذير ف السوق ومليون علامه
من اللي نزلوا ف الكتاب المبين
اوزاي يا عالم لم تقوم القيامه
أم هيا قامت واحنا مش داريانين !
ملعون أبو الأشرار وهما كتار
كتار قوي .. والمخلصين م النوادر
ندرت ألعنهم ف كل نهار
ولا أكف اللعن ما دمت قادر !
رجمتهم بالطوب وبيتي حجر
أما اللي بيته م القزاز الهزيل
لو أخبطه بتفعيله راح ينكسر
ولو حدفته بشطره يسقط قتيل !
حاربتهم بجميع ما تملك إيديا
وواجهتهم ف حرب مالهاش مثيل
هما النفوذ والمال وجيش بلطجية
ونا إيدي ما ملكت سوي التفاعيل !!
العصر مشهد جنازه والصبح مولود .
والضهر ساعة رهق فوقها الزهق ممدود .
ومغرب الشمس شيخ شاحب هزيل مكدود .
ودا بعد خطف العشا لهف العشا كالفرض
لحم الدبيحه دا واللا نخوتك والعرض
وما عاد خلاف السهر وقت السحر للروح
تناجي صمت النجوم جملة هموم وجروح
لحد ما الشمس تبدأ يوم جديد مفقود !
الشعر مقطوع اللسان واليد
مخصي من القول والمشاوره
وملقحينه ف عنبر المتروكات
وماتت الأغنيات
بنقيق عديم الشعور
يدعم الضلمه وينفي النور
اتقلبت الموازين
المجرمين علي صدرهم نياشين
والقتله والسفاحين
اتخلصوا م العقاب
بخطيب مفوه وبشهاده زور
واتشبع الجو المحيط بالجور
دخل الطبيب ف التجاره
والاجتماعي صار خبير إعلانات
وأشهر المحامين
حقق ثراء يتعد بالملايين
من حنكته ف الطعن ف الإجراءات
وقدرته علي انتزاع براءات
لمهربين هيروين ومخدرات
الظلم قاضي القضاه
صاحب المنسر أمين ع المخازن
ومكانة الرقاصه واللعيب
فوق المفكر والأديب
واللي فشل ف الدراسه
فتح بوتيك وركب رميس
بيحمد المولي علي إنه
ما طلعش عضو ف هيئة التدريس !
وآخر الأخبار
عملوا القواميس كلها قراطيس
وباعوا فيها فشار
وآخر الأحكام
اتسجنت الحكمه بتهمة تسول
والعدل خد إعدام !
دي كانت الصوره
اللي عليها سدوم وعموره
عشية الهول العظيم
اللي طوي الأرض بمحافلها
وجاب عاليها سافلها !
أبو اللغد العجين
والخد أحمر سمين
هاضم حق الغلابه
وحارس الروتين
ومكتبه الخطير
يشبه جناح أمير
فيه السكرتيرات
مدمات علي بنات
يقولا أولا لا
وإيه وأده وآه
وجيش من السعاه
خدم وفراشين !
لو عوزت يوم تزوره
الضهر ميعاد حضوره
بيجي وف نص ساعه
ينهي جميع أموره
وأموره إمضتين
وياهم شخطتين
ثم ينظر ف ساعته
تيجي العربه بتاعته
يخرج رقيق وحالم
لكنه مش مسالم
لو حد له مظالم
قابله أثناء مروره !
إيه تعمل يا فقير
ياللي عيالك كتير
ما دام ورقك يا عيني
في مكتب البنكير
اصبر والصبر طيب
وكل شئ قريب
يمكن مثلا تموت
ومشكلتك تفوت
دا محتمل ... لكين
تظن يا اسماعين
خير في البيه التخين
تبقي ساذج كبير !
الطف بي يا لطيف
م الموضوع المخيف
بشتم بنكير بحاله
ودا رأي مش حصيف
ولأنه تخين شديد
ميت كيلو أو يزيد
راح أفطس لو خبطني
باليد وللا شاطني
دا احنا ناس خفاف
م الجوع دايما عجاف
وما حد منا شاف
بنكير واحد نحيف !
عرض تجريبي للمدونة
