البيه بيكتب كل ليله مقاله
حسب مزاج المقصودين والحاله
وعنده مكتب أو محل بقاله
بيبيع وبيوزع هراء وذباله
ولو ف ليله تعزمه مغنيه
صوتها مسجل ف البوليس بقضيه
الصبح تطلع ظاهره فنيه
محتال وحالف ف الظلام محتاله
ويحتفي بالفيلم لو له مخرج
يقدر يطلع من جيوبه ويخرج
وحتي لو كان فيلم عره ويحرج
يقول عليه بالكذب أحلي قواله
يكتب تلات مقلات بفنجان قهوه
بغير وازع من ضميره أو نخوه
حبيب أنا أشكي لكين الشكوي
لغير ربي ف الزمان دا محاله
وما عندهوش مانع يخوض ف سياسه
مع إن عقله لسه لابس لاسه
وعليه تناحه وادعاء وغلاسه
تقل دمه لطشته بطاله
والله وحشنا هيكل
ومين يقايض بالصفيح النيكل
تركونا نقرا لبسطويسي وعوكل
حاجات تزيد الحرف القياله !
