ممعاكش ألف جنيه سلف
أصل الزمن أمره اختلف
يلعن أبو البيت والخلف
والدنيا دي علي بعضها !
ممعاكش ألف جنيه يا جاز
يا صديق وجاي من الحجاز
يلعن أبو أم الجواز
دا مصيبة بدي أفضها !
طبعا معاك فلوس كتير
وانت صديق ليا أثير
أصلي انفصلت عن عبير
ومستحيل أردها !
عايزلي أوده محندقه
صغيره ومش ضيقه
عايز أعيش وحدي بقي
إن شالله انام علي أرضها !
هات الفلوس من غير جدل
ووافقني في رأيي بدل
ما تلقي صاحبك قتل
روحه وع الموت حضها !
وما تحاولش تردنا
وتجيبها تقابلني هنا
أحسن أنا وربنا
لو شفتها راح أعضها !
