الكرنفال

الأدعياء يملأون الدنيا ضجيجا .

يعقدون ندوات شكلية .

ويتفقون مع الصحفيين علي التنويه بهم .

ويشترون اللقاءات التلفيزيونية .

أما المبدعون الحقيقيون 

الذين يسكبون نفوسهم علي الورق

شعرا وموسيقي

هؤلاء يتوارون عن أعين الفضوليين

مكتفين بموهبتهم

ويحتقرون الشهرة

 العشاق الكذبة

يلتفون حول الجميلة المقدسة

يمتلكون آذانها بأنغام زائفة

وكلمات مصطنعة

لتسير معهم إلي نهاية مفجعة

حيث تتبين أنهم اتخذوها وسيلة

لأغراض دنية

أما العشاق الحقيقيون

الذين أحبوها بصدق

فقد أقيمت بينها وبينهم المتاريس

وغطت علي أصواتهم الجميلة

غوغائية متواطئة

سيئة القصد

وغير شريفة

المراسلون الحربيون

الذين كانوا أثناء الاشتباكات

مؤمنين داخل التحصينات المنيعة

يعودون بعد انتهاء الحرب

ليغتنوا من بيع قصص البطولة

كتبا وتمثيليات ومسلسلات

ويتقبلون المديح دون حياء

أما الأبطال الحقيقيون

فلن يحضروا الحفلات التذكارية

لأنهم ببساطة

استشهدوا علي أرض المعركة

ورووا بدمائهم تراب الوطن  

 

 كان الحمام الزاجل

هوه الوسيله

للاتصال العاجل

في مملكه مالهاش حدود

وما كانش فيه قطورات

ولا مواصلات سريعه

لكن بلاد العرب

ف الوقت دا كانت نظام كامل

ودوله واحده

يربطها خيط مشدود

ومن العجيب في قرننا

رغم الاختراعات

بنشوف ما بين بعض العواصم

الاتصال مفقود !

 يا نجمه لولي بين سحب مرجان

هايل جمالك .. بس انا زعلان 

إزاي أهلل للشروق فرحان

ونا من غروب الأمس لسه حزين !

واخد علي خاطري من الأشجار

ومن بزوغ الفجر دون إخطار

ومنزعج من هيصة الأطيار

اللي بعباطه بيرمحوا مرحبين !

ابتدأت التصاوير تسير ف الشارع

هل دول حقيقي ولا تقليد بارع

مساخيط بتدفع بعضها وتصارع

وكأنهم بالضبط بني آدمين!

 
شغلو بالي وأنتو من غير بال

م المستحيل يحصل ما بينا وصال

ومن العجيب أقصدكو بالموال

وانتم بغربة روحي مش داريين !

يا مجروفيين في غمرة الغيبوبه

انتم هباء وحياتكو مش محسوبه

أجسامكم .. الروح منها مسحوبه

لكنكم .. ياللعجب .. ماشيين !

المخلوقات سابحه ف سمت سعيد

الفجر أغراها بكذب جديد

لكن ح تحبط ف العصاري أكيد

وح تنسحب ف الليل بحزن دفين !

مر التذكر لم يلم جروح

ومسكن النسيان دوا للروح

لكن اللي حلمه ع الطريق مسفوح 

محال يكون من زمرة الناسيين !

ما ينعتق من خدعة التغرير

غير اللي وعيه خلي ذنبه كبير

واحد مقابل كل حشد غفير

وعشره من عشره من الملايين  !

طبع الأسد يسكن

علشان ما يتحفز لقفزه مهوله

والفيلسوف يسكت

علشان ما تكمل في ضميره المقوله

ولابد تسقط كل يوم ف الغروب

الشمس لجل تؤوب

مع الصباح الوليد

والموت نفير بينادي ع المواليد

أعجب لضيق عقلك يا عبد اليوم

ولقصر نظرك ع العموم

نظرت للحاضر كأنه الأبد

لا علموك تفهم رموز اللي فات

ولا السفر بالفكر خلف التخوم

لرصد نوع أيامك المقبله

وايش تكون غير حلقة ف السلسلة ؟!

الطفل بعد الضعف شب وقام

وترك لغي الأطفال وشد الحزام

وصبحت شخاليله رمح وحسام

هجم وزود ع البنا سطرين

ولما شاخ ترك الطريق لابنه

ولما خش القبر خش وحيد

لكن بنايته من حجر وحديد

بتقول برغم تعارض الأشكال

فيه شئ بينمو كل جيل ويزيد !

من يوم ميلادي عرفت إني ح أموت

وفهمت ان الموت كمالة الحياة

وعشان كده

وضعت حكمي بين الفواصل صمت !

كأني مركب ف المحيط بتسير

جزئية ف البحر الكبير

محتوم تغير شكلها ف اليم

عارف بإني ح أموت

أو راح تموت هيئتي

لكن ح تفضل للأبد كلمتي !

لما جعلت عاليها سافلها

أنا كنت قاصد أصحي نوامها

وأهز م الغيبوبه غافلها

لكن ويا للأسف

لم يرعوي دونها وسافلها

وبعد أسبوع بالكتير

رجع الصراخ ف ساحة البورصه

وامتلأت المواخير !

الغانيه ف الكباريه نوت ع الحجاب

واتبرعت للخير بوهبه سخيه

وقصدت المسجد بدل ما تروح !

واللص أصبح فجأه قطب الصوفيه

قعد يعدد ف اللي فات وينوح

علي عمر في كنف الحرام اتقضي

ومدمن الخمرة نهض يتطوح

علي ناحية الحمام علشان يتوضي! 

بتجري ليه م القيامه 

إذا كنت مؤمن كن واستقبلها

مش الأسامي كلها ف الكشوف

ومستحيل مخلوق يبدلها !

 الهزه كانت مني هزة هزار

ما كانيتش هزة دمار

الهزة كانت هزة استعبار

هزة مواعظ لجل تنعدلوا

ويستقيم المسار !

محلا الإيمان بالخير

لما يكون باختيار

مش لجل حور جنه ونار جبار

أو لجل مليون دولار

أو لجل خوف م الموت وترك العقار

محلا الإيمان بالخير بلا منفعه

أهو دا الإيمان اللي يدوم العمر

بإرادة الإنسان

اتململ السلطان ف نص الليل

وبان علي وشه الكدر

قال الوصيف

علي جناح السرعة هاتوا المضحك

جريوا العبيد في القصر

وبأعلي صوت نادوا

يا مضحك السلطان

اظهر وبان

لك الأمان والجايزة والإحسان

لكن ما حدش رد

غير صوت غريب قال لهم

مين راح يضحك عظمة السلطان

إذا كان مهرج البلاط

من يوم ما عاد من جولته في المدينة

أقواله صبحت حزينه

اتحير السلطان في أمر خطير

فكر كتير

لكنه برضك ما اهتداش للحل

قال الوصيف

علي جناح السرعة هاتو الحكيم

جريوا العبيد في القصر

وبأعلي صوت نادوا

قوم يا حكيم الزمان

لحضرة السلطان

لكن محدش رد

غير صوت غريب قال لهم

مين راح يلقن للملك حكمته

إذا كان حكيم القصر

لما اتجاهلتوا رموزه ومسائله

اختل عقله

اتهدد السلطان قوي وانزعج

لما علم

ان العدو قاصد الديار

قال الوصيف

علي جناح السرعة هاتوا القائد

جريوا العبيد في القصر

وبأعلي صوت نادوا

يا قاهر الأعداء

اركب قوام علي فرسك المشهور

واحضر بسيفك

لكن ما حدش رد

غير صوت غريب قال لهم

ومين كمان ح يحارب الأعداء

إذا كان أمير الجيوش

بعد النعيم والحاشية من حواليه

بقي يشوف الدم يغمي عليه !!

!!!!!

حرقت للشعر من لحم البدن قربان

وجيت بسن القلم وغرزته في الشريان

ورسمت بالدم ما بين السطور بركان

وسهرت والخلق نايمه في الليالي السود

أعاني خلف المعاني والعصب مشدود

لحد ما صغت ترنيمه في حب الناس

ولما حطيتها قدامهم بشوق وحماس

ما خدوش في بالهم وأفضلهم قرا العنوان

النفس طائر والمدي محدود

والشوق معوق .. في طريق مسدود .

وورد خد الحب زاوي العود .

هل دي نهاية المطاف

ولا السنين العجاف ؟!

لو كان لي باقي ف عمري أشوف السمان

وأمرح ولو أيام في حضن الأمان

وأتذكر الحاضر كابوس هذيان

كنت ...  ياحمل الجبل

تصبح خفيف بالأمل !!

لكن دا حلم يخالف الأحلام

بشوفه ونا نايم ومن غير ما انام

وصاحي صورته ف الخيال ع الدوام

لكن حلوله سد

وبدون بقر يتعد!!

عدد السنين بقي خارج الحسابات

والمرموزين ما بقوش سبع بقرات 

لكنهم قبضه من الذرات

وشئ طويل الأمد

فوق الحساب والعدد !!

ياللي بعثت الرحمه نور انتشر

وتركت ما بينا الشيطان ينحشر

وصنعتنا حسب اختيارك بشر

اغفر خطايا الأنام

واجعلها أضغاث منام !!

بحر الكلام واسع وماله شطوط

أقله صح وأكتره مغلوط

وما فيش رقيب ع اللسان

واحنا اختلفنا ف الحروف والجمل

مين مننا الغلطان ؟!!

لو المناقشه تسير ف درب النزاهه

وتلغي منها شبهة المصلحه

ما نلتقيناش كل مره ف متاهه

كل المناقشات هذه الأيام

أبطالها فرسان كلام

اللي بدون ما يرمشوا يكذبوا

واللي بدون احترام

قلبوا الحقيقه وخلوا حتي المنطق

عند الغرايز يشتغل خدام !

بيني وبينك شبر

بيني وبينك قدم

لكن لقانا محال

بيني وبينك كبر

بيني وبينك ندم

بيني وبينك انشغال بال

واختلاف وجهات نظر

لا تحسبي المسافات بالأميال

دا ياما من مسافات فلكيه

قطعها ضوء النجم ف ثواني

ولكن المسافه المحاله مهما كان قصرها

هيا اللي تبقي مش ف إمكاني !

العصر دا عصر الزواق والشكل

اللي بلا مضمون

رضع ولاده كل قناعاته

وحط فوقهم راياته

وكل شئ محسوب وله مواصفاته

من السلع للفكر والنزعات

حتي مرادفات العواطف

من شوق ولهفه ورغبه وتنهدات

متصنعه ومتغلفه في بورصة السندات !

رافض أنا فكرك وذوقك

ولهفتك ع الأبهه والجاه

وفكرتك عن الحياه

فهل يعوض دا حب الجسد

شئ مستحيل

الحب ما يصمد ويبقي له ذكر

إلا إذا كان بالجسد والفكر !

مافيش صباح ولا رباح

اتحاشوا جوه ضيق المخ واهجروا البراح

وكل شخص يحذر المزاح

وبعد نوبة العشا

يعمم النواح !

ممنوع بتاتا خفق أي قلب بنت أو ولد

واللا ح اجعلها علي روس الجميع هدد

والمشي ف الطريق مع الحريم جريمه

وكل من تخرج لوحدها أثيمه زنيمه

يقفل عليها جوزها أو أبوها ألف باب

لأنه هوه اللي ح ينسأل

يوم الحساب !

تتلم كافة الكتب ف كل أفرع العلوم

وأغلب الكتب ف الفلسفه

يا تدلقوها بالمراكب خارج البوغاز

يا تحرقوها بجاز !

تنسك كل دار لعرض سيما أو مسارح ...

واتعلموا إن الموسيقي والغنا حرام

وكل مخترع شيطاني أجنبي

خطر علي الأفهام

كمثل تلفاز وللا فيديو ولا راديوهات

كل الحاجات دي موبقات

وح تبقي ممنوعات !

يطول الرجال دقونهم

ويلبسوا ملابس السلف

ويفرش الأسفلت بالرمال

علشان ما كانش فيه زمان أتومبيلات

وكلكم ح تركبوا الجمال !

!!!!!

رد البيبان في وجه من عزآك .

واغرق لوحدك ف الألم والسكات

لا الخلق راح تدري بما جوآك

ولا العزا تقدر عليه كلمات

واهرب بحزنك بعيد

وانظم لروحك عديد

وقعه شديد وجديد

وأمر من حزن ثكلي

فقدت وليدها الوحيد

كان الأمل مرسوم علي النني

وكانت الأحلام وساد النعيم

لكنه خاب من غير خطأ مني

وصار ميراثي من حصاد الهشيم

آه يا زمن خوآن

تجزي كما الشيطان

النبل بالخسران

وتحابي أمثالك

ع الشر ...  بالإحسان !

لا تندهش لدناءة الأيام

واشرب كاسات خذلانك المترعه

الحظ ضربه بتنضرب ف الظلام

ومش ف بالها اللي تعب أو سعي

ويا روح يا متكدره

اتجرعي ما جري

ويا حسره متحضره

شدي نياط القلب

وافريها بالمبشره !

يا اللي رفعت القامة عند السحاب

مش من مقامك تصطلح والزمان

ما كانش حقك تنخدع بالسراب

ولا كان يجب تصديق وعود الجبان

يا شمس وهمي وكدبي

خلف الضباب استخبي

ومحال يا نفسي تقبي

من ليل قرار الكآبه

علي شهيد وهم قلبي !!

لا ينقهر قلبك ولا تتغاظ

كمل طريقك وانفض الأحزان

لا الرمل يطفي لمعة الألماظ

ولا الرياح تخمد نيران بركان

ياخطوتي الشاسعة

في دنيتي الواسعة

يا بخت من يسعي

ف الحر واللسعة

ومن تجاربه يلقن الحفاظ

لب الحكم ألحان وسحر بيان

يا من مشي لقدام بدفع الضمير

لا تنشغل باللي بيجروا لورا

جهدك طلع ف الشمس أزهر منير

بغز عين اللي جحد وافتري

يا قسمة العادلين

مين ... كف ... ذاته ومين

فرد إديه لتنين

ومين مشي بوشين

ف الوش يهدي المدح بالقنطار

وف القفا غدارة متعمره !

كيف تندهش م اللي ف قلبه دفن

وانت اللي عارف طبع طين اللئام

الندل ينسج من دناوته كفن

وتحفظ العفه حياة العظام

خانك صديق غادر

شئ عادي مش نادر

والمجرم السادر

بالشر لو بادر

كيف يدهشك باللي حواه من عفن

وأنت اللي عارف إنه بعض الأنام !

راح تفضلي ياعفه تاج الفحوله

وح تلتفع بالاحترام يا شرف

مهما الخوارج فبركوا من مقوله

ومهما غرقوا ف الهوان والترف

وما يدرك الغافل

في مجلسه الحافل

إن الطريق قافل

والمنحدر سافل

ويا إما ذكري تستحث البطولة

ويا إما ذكري تستثير القرف !!

صحيت ف غبشة الشروق

أنطور الحروف علي الورق بلا نظام

وأعود ألمها

لعل بالعفوية تصدف كلمة لها معني يتقري

اتكونت لي بالصدف كلمة ...  حرام ...

مين اللي يستجري بقوله يطرق المناطق المحرمة ؟!

حكمت عقلي وانتبهت للحروف

خطيت سطور متوافقة ويا المجتمع

لكنها متخاصمة ويا الشعر !

إذن لا مفر مكتوب علي الولي يجابه الخطر

دون اقتحامي ساحة المحظور ح تنتفي الدرر !

دونت كل ما بدالي وانتظرت خشبة الصليب

وفرقة الحرس

 حطوني بالمقلوب علي حمار وجلجلوا الجرس

بكت علي مصيري صحبتي وقهقه العدو الخسيس

لكني كنت ف قمة انتشاء الصوفي لحظة الشهود

من متعة التجريس !

منه إليه 

خلقنا م العدم وحث خطونا ف طريقنا طريقنا ليه

لو كان يخالف ما رأيت

ما كانش ثبت في ضميري أنبل الأفكار

وأعدني لأكبر الأخطار

قالوا اعترف برفضه سنة القطيع

أيوه اعترف

واللي ف عرفكوا العليل زرايه واحتقار

أراه ف عرف الحق ذروة الشرف

!!!!