مدونة تماضر الخنساء حمزة

أبحرتَ فيهو الريد..وشفتَ كم معبود
قالوا الجمال مقصور بيهو الطبيعة تجود
وفيك بنالو قصور وسمح الخصال منضود
وصفوك وقالوا ملاك ومثيلو ماموجود
يانجمة الافلاك الحسن فيك مشهود
قلت شفتو سواك عارفو الجمال محدود
ومهما كنت ملاك برضو السماح معيود

ياحِبي ما وصفوك وعينيَّ كيف نظروك!
وبشوف كمان جهلوك كتير كمان ظلموك
يوم قالوا ليك مريود
قبلك هل بكون حبيت؟ ..أعلن قليبي سجود.
وفي طبعك إنتَ حكيت ..مثالي مامعهود
في لحظة ليكَ هويت..وهل بكون موعود
نتشابى ليكَ وليت تدينا برضو عهود
هل بنسمو إليك..أم بينّا تبني سدود
سباني ريد عينيك..وعينيك معايَّ شهود
وكلما أقول بتريد يغلبني فيكَ صمود



آمنتَ بيك ياإله زيادة ياالمعبود
شفتا الكمال في حبيبي
وحبيبي زادني صدود
وكلما أبيت ناسيك..
تصبح معاي..موجود
قول ليَّ أيه الحل..
وفي حلمي شوق ممدود
بقدِّم ليك فؤادي وفي الريدة لازمو لحود

ماكفاية أقول ياملاك..لمتين تجيني تعود
ولو تزيد في جفاك.. جفاكَ ليّ محمود
قول ليَّ أيه ضرَّاك..لو بالوصال بتجود

شايفين سماكَ العالي وفيك العناد محبوب
لاتسأل كمان عن حالي وإنتَ الجواب مرغوب
إنتَ ..إنتَ .. وداري وفي هواكَ بذوب
لو شفت اولو حالي ..شايل المحبة ذنوب
لو تبقالي إنتَ التالي ..بلزم هواك وأتوب.

وبعدين معاك؟؟
طوَّالي ظالم في الظروف
متسبِّب إنَّك..إعترف.

غلطان هواك الماقِدِر يتحدَّى ..حالاً..
أستبعد إنو
وماأظنو..
المستحيل ..
إنتا طبعك(مُنصرِف)
غلطان قليبك ماعِرِف ..إني طبعاً
وبعترف..
_فيما مضى_
بهواكــ جداً
جداً
و..
بي شغف
ماني ندمان
لاني..أبداً ..منكسف
ولاني طالب للسِتِر
..ومااااحليل..
ماهي بالغرويد بتبكي
لارمشي برضك برتجف
ديل عيوني بعد ماشفتك
سكَّرني ريدك
سكَّرني..جداً
وااعي وهويتك .. قطرة..قطرة..وبرتشف
حبي وااضح ..
وبرضو..جداً.
ماهو البعيبني
أحمل إحساسي الجميل بيهو دايماً مُلتحِف
واضح حقيقي ومنكشف
بشتاقك شديد.._وبيني بينك_ لالا
بيني والناس أجمعين_أسي مشتاقك شديد_حالي محتاجك شديد_أنابعترف
ماغريبة ...
جداً
وبي ترف.
عِرفتا ليه..إنِّي فرحان بعترف؟؟
وكيفن نسجتا الشوق نجف علي خيوت الليل بشوف
لمَّا تستوحش نجومو ..منو البسامرو
أذكِّرك؟؟
...
في النسيان طبعاً لأنّك..محترف

منو
الببقالو دون الناس ضيوف
حزنو..بيخِف

يازول أقيف
وبعدين معاك؟؟
انتا ياريحة الجروف
ياأحلى من كل ..المواسم
نديانة بي طعم الخريف
أحلى طعمك..مختلف.
يازول اقيف..أنا عندي ليك كمين كلام
ورزمة من عتب الحروف

اوعاك تقول إتعاكست برضو الخُطى
ماعاكست دربك خطاي
لاخطاوي الأزمنة
والريد.. _عارفة إنّك مُعترض_لسَّه بنضح شوق عطور
واشواقي فيك_يازول في هروبو شوف..حل مؤقت للحضور_عارفاها فيك متمكِّنة
ماأدت الغير الإمارة
شان ترجع والنبرة طبعاً (ياخسارة) "..أمير الشوق هوَّ الفرقنا"

ياحِبي لو تسمح دقيقة
أنا عاوز أملِّكك صِدقاً حقيقة
الزمن الجميل لسَّاتو حاضر
في أملنا
ماخالي ياقلبي الأمان
أبقى للناس المحنَّة

إنتا راجي السكَّة تشعل ضو زمنَّا
ومن إيدياتك تسوقك؟؟
تاتيت..ولسَّه بتتاتي في ظروفك..
مرَّة تلبس..خوف ..حروفك
شان إنتا تجدَّع بس همومك
ومنِّي تبعد ولسَّه لسَّه
لسَّه بتقول :" فرقتنا "!!

لو صحيح غلط في الريد بكون
ببقى غلطان قلبي رادك وليك حنَّ
وإنتا_قطعاً_ماكا غلطان البتحلم
غلطان أكيد النوم ..سرقنا

في المبتدا
مادوَّخت أحاسيسك مشاعري
لكن أظِن..
لالا..وبأكِّد
بالدوخة قلبك مبتلى
وفي المنتهى
أعرِف إني يوم حبيت عيونك
شان فيها شفتا النيل جرى
صااافية مويتو
صافية شكلاً ومحتوى
فيها برضو الريد بعيش
ومنو بتنفس هوى
وإني يوم خليت عيونك
شفتا نيلي الكان بيجري
بين عيونك..ويدي خيراتو المدى
شفتو جفَّ
جفَّ موجو..

جفَّ ريدك
مات أظنُّو وإنتهى.

الغريبة ..إنَّك تفكِّر..
ذيَّك..نسيت
إحنا ماالإتنين..سوا!
أيه عرَّفك..إني ظالم للهوى
إنتا ياأسباب أذايا
غريبة برضك..ليّ دوا
أيه عرَّفك
بالفي قليبي..ومانوى!