مدونة تماضر الخنساء حمزة

لو..هطلت مواسمي عليك
هَلْ ...ياإنتا..إنتا بتحتمل؟؟
بتحتمل..لمَّا في موسم سكون..
أملاكــ ضجيج..
وترحل معاي حد الغيوم؟؟
بتحتمل ..تشواقي ليك..
عارفاهو أكبر من قلوب الناس جميع
لكنُّو أقل..لو قِستو بيك!
جاوبني بس..أديني بس إذن الهطول ..
شان تعرف الغرق البكون..
سيدو عطشان للمزيد.

خلاس
وكت أديتني تصريحك..هطول..
في الأوَّل ببادر بالغيوم..
شايلة من عينيك حنينا
والسفر لو ..ليك يطول..
برضو بستدعي السحاب..
في حضرتك يحلو المثول..
وبنادي نسّام المحبّة..
ياخي قول وأطربنا حبّة
ده الفؤاد بالريد تعبأ
وهوايَّ مابطراو ذبول.

هلّت مواعيد الخريف..
بين الظنون أوعاك تقيف..
دفقتا فيك ..إحساسي بيك..
وكان المطر..أصدق رسول.

يــامنستر
خلف الهموم ..شيل الصبر
أمرق تعال..
عِشقك.... أمر
إستبين الجيَّّة نص المستحيل
عكس إرتهانات ..القدر
مالو مستغرب سؤالك؟؟
غنايَّ ..معطون بي كلامكـ
ومابلوم فرح الوتر
قبلو رقَّصني..الحرف..
وقلبي بي طربو ..إستمر
لو تشوف البعد ..حار..
قُرب العيون..الفيني..منَّك..
إنتا لو تعرف ..أحر!
وبعدما ضمّيتو.. عِنية
وبين إيديك نام..المطر..
جاي بتسأل : " وينو " برضك
وهطولو..أمرك..منتظر
لحظة..لو فَرّيت ..أصابعك..
بيناتا ..تديهو المَفر..
علينا ينزل شوق..رذاذكــ
يغسل..مسافات..السفر.

ح نكتب ليك..إنتا أشواقنا..
وقبل السرعة..نرحل ليك
عشان..عينيك قبل خاطراً
بجيبني ..عليك
بنتشابى ومعايا سحاب
بيحلم بيك
مراسيل الغرام تاهت
وكت وصلت رُسُل عينيك
ضلّت حروف الريد
وإرتدت من العشاق
كتبت شهادة الشوق علي خديك
ولمَّت مكاتيب الغرام والريد
معنونة بي حكاياتك "وكت يمثل ريدي بين إيديك "