مدونة تماضر الخنساء حمزة

الزول ..السمح..
ياريتني لو فيك إترسم
أتلونك لون الفرح
أتوسدك وإنتا الغمام
أتلمسك وإنتا الجرح
ياريتني لو بكتم هواك
مشاعري ديمة بتنفضح
ريدتي فى عينيَّ ظاهرة
وشوقي للزول السمح
قلبي فارد ليك شراعو
وأبواب محنة بتنفتح
أنا بيكا أدمنتا السماح
والبيَّ.. فيكا كتير سرح
وشلتا من عينيك أغاني
بان غرامي.. وإتضح
رتلتا ريدك في وريدي..
ونسجتا من دمي ..السبح..
وكانت اللهفة ..الخرز..
الفيها قلبي ..كتير..سبح
دمايا في خلوة ..وسجود
ماالشرعو ريدك. ..أكيد رِبِح..

منو البعرف إشيل شوقاً ..معاك إتقاسمو المشوار ..
ومنو البقدر إشيل درباً مشيتو وكان نهايتو....سراب
نضمتا سنيني بي شوقك ..خيوت ..إتخاتفا ..المِترار..
ولبستا اللهفة في عمري ..وكانت أيامي ليها ..رقاب
سميتك.. فيني ..إنتا سحاب..وإشتهيتك ..يوم تكون أمطار
وشلتك.. برضي في حتة ...كانت في الوريد..محراب
مرَّات تدوبيلي..الفراق...ومرّات ..أغنيلك ..مزار
بتونسك بين المسام..وبين الدواخل ..زي ..صحاب
وبتحسسك.. نجمة هواي ..ومرَّات أحس إنك نهار
وزي تقول إنك غُناي ..وحرفي ليك هوَّ اللي جاب
بشتهيك ..تفضل براك ..وغيرك...تشتهي الأعذار ..
إرتضيت مني العمار ..وإرتضيت فيني الخراب
إتلبَّسك مني الحنين ..زاهي بي لون السمار ..
وكِت صادف جفاك ..الفيهو ..روَّح ..وفجأة داب .