مدونة تماضر الخنساء حمزة

حتى كلامك أصبح جافي ..
ونبض الشوق إتوارى و..عدَّى
أصلو الكان بيناتنا منافي
رغم الحزن الساكن ضلك
قلبي بيغفر ..ولسع صافي ..
ورغم الريد الودَّر دربو ..
كل الغلط المنَّك ..عافي
وكل الجاي من زولاً زيَّك
مُرو نشوفو..الطيب وشافي
صعبة الكلمة تغادر جوفنا..
تجرح حتَّى المعنى الخافي ..
وساهلة الكلمة حنينة بتمرق ..
تدِّي الطيبة ..الفيكا ..مرافي.

كلامك بتعِّب قوافي القصيد ..
إجدِّد حياتي الشجية ..وإقلب قديم البحسَّك ..جديد..
صوتك ..بخلِّد حِسي وبعيد..
لحناً توارى ..معاك.. بستعيد..
ضجة مشاعر ..بتعشق شديد..
زولاً بودِّر حنينو الهموم ..
وبنسج خيوتي ..التريد..
تنضم حروفك..عقداً إزغرد حلقي وإبشِّر قليبي البريدك ..بجيد..

وصولك ..بيرسم ملامح غُناي ..
إجدِّد حروفي ..وإقلِّل مواسم أذاي..
وجودك بعزّز حياتي ومُناي ..
شروقك بيعلن ..صباحي وإكتِّر منابع ضياي ..

أقيف النلملم ..حواسي ..
أهدهد مسامي ..وحنينك مدفّق وجاي ..

الكلام ..ماكِمِل ..
بس غناكا ...البعطِّل ..
حواسي ..و بتسرع ..تجيك ..

وإرتجيتك ..
مالمتا لحظات الغياب
ولا ضيَّع اللُّقيا إبتعادك
وحمَّلتك الأعذار
وإبتديتك..
والشوق برتِّل في كلامنا
تتصفَّح اللهفة ..إنتظارك
وتختم الأذكار
أصلي مولودة محبَّة..
وشاربة من لون السمار
عِزة ماشافت مذلة
وشايلة من عينيك ..وقار
وجاري في شرياني.. نيل
متوسِّد البلد ..إنتظار
شفتو ممكون ..الشمال ..
دلوكتو ذي فاقداهو ..طار
ونخيلو موجوع الشموخ
وقمريهو نائح..وفجأة طار
جنوبو ماعِرف ..الأمان
لاهي الغبينة ..ولاهو تار
كانت بداية وماإنتهيتك
والحرف موعود ..إحتضار .,

وإبتديت أحلم معاك
غفوه فى الزمن الرهق
نكسر متاريس الطريق
نرسم اللون الوصول
توب بيتوشَّح سماك
مابين تباريح الظلال...
ودفْ ألوان الشفق....
ساعة غروب المستحيل
سمَوهو..
بعض الناس أفول !


****

تقرا فى خاطرى السؤال
جوابو حيفاجئك جرح
تقدر تبدِّل لوعتو
ونهاية العشق السرح
لو بس لقيتك أوَّلو
كنا صادفنا الفرح
إنتَ الجمال بتكمِّلو
يابلبل الدوح الصدح


****

أوَّل كلامنا الشوق
وآخرو أضعاف أوَّلو
ماقلنا سمُّوك.. الفرح
ماصدفه يالأصلك حلو
لاجينا فاجأنا الحنين
وكتين عيونك إحملو
تشواقنا لى زولاً ولوف
قاصدين نحسو ونوصلو


****

لميت رياحين الكلام
قُت ليها قلبك فرِّشى
يبقى للزول البريدك
بيت أزاهر وأنعشى
أديو أريجك والمشاعر
أسقيو رحيقك وإنتشى


******

ووقفت بين عينيك مسافه
مرَّات إتعبنى الهيام
ومرَّات إودرنى المشى
لانى قادر أوصلك
لانى بقدر أبتعد
مكتول قليبى ومنتشى
إلا بس غالبنى ريدك
شاعلنى حد الإبتسام
سالب فؤادى وكل شئ


*****

دربين َمفرَّع إتجاهن
النهايه لى ذات الوشى
إن كان مشيت حد السعاده
جد بلاك ناقصنى شئ