مدونة تماضر الخنساء حمزة

وإبتديت أحلم معاك
غفوه فى الزمن الرهق
نكسر متاريس الطريق
نرسم اللون الوصول
توب بيتوشَّح سماك
مابين تباريح الظلال...
ودفْ ألوان الشفق....
ساعة غروب المستحيل
سمَوهو..
بعض الناس أفول !


****

تقرا فى خاطرى السؤال
جوابو حيفاجئك جرح
تقدر تبدِّل لوعتو
ونهاية العشق السرح
لو بس لقيتك أوَّلو
كنا صادفنا الفرح
إنتَ الجمال بتكمِّلو
يابلبل الدوح الصدح


****

أوَّل كلامنا الشوق
وآخرو أضعاف أوَّلو
ماقلنا سمُّوك.. الفرح
ماصدفه يالأصلك حلو
لاجينا فاجأنا الحنين
وكتين عيونك إحملو
تشواقنا لى زولاً ولوف
قاصدين نحسو ونوصلو


****

لميت رياحين الكلام
قُت ليها قلبك فرِّشى
يبقى للزول البريدك
بيت أزاهر وأنعشى
أديو أريجك والمشاعر
أسقيو رحيقك وإنتشى


******

ووقفت بين عينيك مسافه
مرَّات إتعبنى الهيام
ومرَّات إودرنى المشى
لانى قادر أوصلك
لانى بقدر أبتعد
مكتول قليبى ومنتشى
إلا بس غالبنى ريدك
شاعلنى حد الإبتسام
سالب فؤادى وكل شئ


*****

دربين َمفرَّع إتجاهن
النهايه لى ذات الوشى
إن كان مشيت حد السعاده
جد بلاك ناقصنى شئ

ماشفتا الغيم البرحل ؟؟

وكيف بتوسَّد شوقك وضيَّك ...

ماشفتو الليلة إتمهَّل

وجانا إتحكَّر جوَّة عينينا

لمَّن شالت ..نبض الزيَّك

ورسمت صورتك تعكس

هيَّ دواخلك وتجدع

فينا المطرة المالحة

إكبر ..وإشهق زرعك

رغم ضباب القسوة

إلا بتقوى الروح الخضرا

وتطرح إلفة تعزك

نسيت ؟؟

ما أنا بتغتغت فيك بالغيمة

ماإستنيتك ..تجي بالصدفة ..

تجي نتواعد ؟؟

وكت الريد..وساعة الفطرة

إمكن تبقى رسالة

وتوحي الناس ..صدق العرفة..


بين قدسية الواقع.. ونبض الفكرة

تجي بي ( سراً ) ؟؟

ياااه ...أجمل ( جهراً )

بتقوِّي الصدق الفينا

وبتعطِّر فينا مسام الذكرى

ومابتفوت...

ياصندل الروح البفر

جوَّة في صوتك ..صداك

وتفضل تشد حيل الأغاني

النغمة في.. حسك ..براك

ولابتموت...

جوَّانا ..متوسِّد ..خلود

رغم اليباس ..لسَّه متعطِّر شذاك

رغم الجفاف ...نحنا بنخدِّر ..معاك..

هل تفتكر ..

مرَّة حيصيبك ..خفوت ؟؟

وإنتا بتحنِّس ....سماك

تسند ..كتوف كل البيوت

تشتل الأفراح ...خُطاك..

مابتحتضر ..

بتحدَّى فيك ..قانون ..وجود

تعرف ..؟؟

إنِّي ..بتنفَّس ..هواك..!!

وروحي إتشرَّت ..خيوت ..

منضومة بي شوقك ..براك

معتوقة ..من جيد ..القيود ...

مطلية بي لونين ..رضاك...

والتاني ..ماطبعو ..السكوت

تعرف ؟؟

فينى كمَّلتا... البراح ..

قويت ..عصب.. ضد.. الهلاك..

ومابتفوت..

يافرح ..عِز الحريق

ورقصة على.. صوت الصديق ...

وحرف ..بتوجَّع ..شهيق !!.

بلدي وسليل الشوق
هاك ياروحي دعواتي
بلداً بالوجع ممدود
متلفِّح سواد الكلمة
وقفت في الطريق ... مسدود
إتمدَّت علي النيلين
موجاً بيودِّي ..أريج دعاوينا
وإرجِّع في آمين ..مردود
ماوصيتا
جدلة ضفاير الليل
تنشرَّ على موجك
سوادا
وصندل ..معتَّق من قبيل
ماوجعك طول مسافاتك ؟؟
وإختيارك تمشي فى الدرب العديل !
إنسان بسيط
زي أبوك ...ويمكن أخدر .. بي قليل
مايبَّست زرعك غمامة
إستوحشت تهبط علي مساديرك تشيل
دوبيت بيتفتَّق سنابل
ويرمي بذرات.. خصَّبت جواكا نيل
بسقي آلاف الأماني وتتمنَّى لو لحظات تطيل
تأمر الشوق السواقي يروي كل ماالحيل إميل
وميَّل معاو حال الأغاني ..صبح الحرف حزنان ..هزيل
مابتدور تفرح تسارق
و وكت الضي إصادف لقيا تفرح بي شليل
بس تريد تفرح مواعِد
كم صباح.. ورزمة من زمناً مُعاد ننسى آهات ( الحِليل )
زول بسيط ...ومابسيط..
هل هوَّ عادي إجري في جواكا نيل ؟؟
رغم إنو عادي ... الإرادة تكون نخيل !
تعال ..نتواعد
نجدع مطرة ..تلز القيف
أكيد حنسد الفرقة البينك وبين أخوانك ديل
تجي نتحالف ؟؟
نخلط سمرة نيلنا بشوقك ؟؟
وبخور إيمانا ...إعتِّق سكة إسوقك
لحدِّي الوطن الواحد
والرب الواحد
تعرف إنو الحب دليل ؟؟
إنو الإلفة بتقدر توصل حتَّى منابع القسوة ..تزيل
تعال يا نيل

.

وذاتَ إشتياقٍ

حين أراقبُ وجدي

أتدري ؟؟

أنَّ غيابك يُلغي كوني

يُزيلُ سمائي ..يمحو أرضي

..يُشتِّتُ بعضي

أدركُ أنَّ وجودك يوجِدُ نبضي

حين يطلُ بريقك

أعرفٌ أن صباحى أهلَّ

حين أذوب بلمسك

أعرفُ أنَّ النارَ سلامٌ ..وأن حريقك لاشكَّ ..أجلّ

أتدري ؟؟

أنّي أهرب عمداً حين تفيضُ عطاءً

أتدري أنِّي أقوى على الأعباءِ جميعاً

وعندك ..ضعفي يهمسُ ...همس إنتشاء


يضيعُ إنتمائي


أنتَ تُشكِّلُ ..

كيف أكون ..

وتبني الملامحَ

ترسم كل الخلايا ..بلونِ إشتهاء

تصيغُ قوامي ..مقاساً حدَّ بقائك دفء إرتداء !

وحين تُشعل فيَّ الغيرة

تُحركُ عصب أنايَّ الأعوج

تبدأ ..ثورة

بين الثقةِ وشك الحيرة

ثمَّ ..تعودُ اللهفة

تحمل كفاً تُقسم

أني وحدي أشعلُ وقتك

أني أسري نبضاً يحي وريدك

أعرفُ أنِّى أنثى


أتعلم ؟؟

أن صباحي يبدأ عندك

وأن الليل رهن الشوق

وأن النجم يسأل عنك

يسكنُ صدري رغبة

يملأ أفقي سؤال

أترهقُ وقتك أنثى غيري ؟؟

تخبرنى أنك عمداً

تركت الزمن طي ردائي

أدرك أنى أنثى

أنا من منَّك بطلع أبشِّر
بى يوم بكرة الإسمو حقيقة
ومن يوم باكر بطلع بعدو
إروِّح خوف الإلفة
الطارت ركت فى أمبارح
وغصن الفرحة إتيبَّس
أنا من منَّك بشرق شمساً
بدِّي البزرع لون الخضرة
وبنشر شوقك جوَّة حنينى
وألبس نيل البلد المنَّك
بنبع ويجري يحدِّد كل مساحة الزول الأغبش
حنين بتشرَّ وتوب فى طرفو الشافع
بباري الخطوة ..لاحفيان الكلمة
ولاهو الخايف
تتهدَّ شقاوة اليوم بى رغبة
ماتتلبَّى ..شان ضيق الإيد أو ..شان الحال من حالك
أنا من منَّك بطلع أساكك
رزق الجاي مغبَّر
مهدود الخاطر إلا عشانك
بجي متلفِّح عيدو الفايت
أصلو إتعوَّد ..بس بالفرحة إقابلك
رغم الحزن الفيهو معشعش
وقولة الحق الماتت غصباً
عِلا بهدهد أملو وساكى عمارك
ماهو التاكل قيفو
وراجى الموية ترطِّب هيفو
وتجى تتمدَّ تهدد دارك
ولاهو الشايل سيفو
وبارم زيفو
ومامتناسي إنو النيل ده سمارك
وإنو الرملة برضو بتشقى
فى كل موسم يوم مايعلن هوَّ جفافو
وتفضل حاضنة يباسا مابتفرط يوم فى عفافو
وأكيد النيل بتعبَّى
من الحق المطرة
وإرجع دافق...وافر..سامق
وبرضك
بطلع منَّك

الريد بدايتـو معـاى
جواى زمن مختـوت
قبال ألاقـى  عيـون
أسكن حنينـا بيـوت
شايلاهو ليكـا كتيـر
جواى مدفـق يـوت
يلاكـا نبـدا نبـوح
كفانا ياخى  سكـوت
قـول ليـه  ياحبـى
أنا ريدى حد المـوت
أحكيلى عن  شوقـك
لى جرتقه  وزغروت
أدّى الخجـل بـراى
سكه إمشـى إفـوت
وأقول كتيـر  عنّـى
وال عنى بيك مبسوط
تعالى عشعش فينـى
نفـرّح  المكـبـوت
قلبى بشتـاق  ليـك
شريانو جوّه بجـوط
دايرك وريـد  إديـو
محـنّـه المـريـود
سؤال كتير  حيرنـى
أدينـى ليهـو  ردود
بالذمه ماواحشـاك؟؟
تلقانى خاليه قيـود !

وألملمُ ماتبقَّى من الأوجاعِ فى زمن الشكوك
حين تأتى طاغياً تنبشُ الذكرى تُحيِ التفاصيلَ المثيرة
إعصار ...
يجرفُ ..حواجزاً سميتها قهراً مستحيل
وأرجوك ..
رغم التضاريس التى سارت على دربِ الفرح تهيأت نشوة ..
تلوَّنت لون إشتهاء ! ألا تبتعد عن عالمٍ أدمن رؤاك ..
قد يختلط أبداً عليه أن يفصل الرؤية بين لون الماء ساعات الصفاء ولون الليل إن غاب الضياء.. لكنه أبداً لايتغابى إشتهاءك حين إلتقاء
إنى أنهزم....إن أردت كبت أنوثةٍ نضجت على حرفك وإستوت ثمراً..
عليهِ من بصماتِ..شوقك ..إنتشاء ...
ففى ذاتِ العروق تسري أوجاعٌ تكسِر فرحتى عند إغترابك ..
عنِّى عامداً ..تحقن وريدى ..تحيةً تقطر جفاء

وكتبتا ليك