مدونة تماضر الخنساء حمزة

سلام..مابتحمّل الأشواق

لكنة صوت حبوبة....ريحة اليٌمّة..وشدرة حنّة في طرف الحوش
والحوش مرشوش
لمّة ناس..وشوق بيتعِّب بيتنا وانت بعيد.


توازي في قعدة خواطرك..
خواطري كان تعرف تَمِش!
تفرد خطاك؟؟
تقصر مسافات البعاد..
تلبس مساحاتي العشم

!

الجيّة..
بتعادل خطوة منك
وواحدة مني.

لو قلت ليك الشوق دفق..
قبال مواعيد اللقا..
قبال مروقك للتعب
أو تخطيك الوجع!

تعال..همومك تنتهي
ومن فوق سمايّ تنزل قوانينك عليّ
تعال ..همومي بتنكفي
وتفرد مواعيدك فرح معروش بـ شئ
من حقيقة ومن خيال.

!
لو مشاويرك محال
بمشيها بي قُدرة خٌطاك
ببداها من ساعة توجّس
لي حين بيتيقّن لُقاك.

ليه ..بعد
الخطوة جد وازت خُطاك!
والكلمة طلعت في سفر
شدَّت رحالا عليك مشت
وفي سكتا..
رسمت خطاويها المعاك
هانت مشاويري..إنتشت
قرَّبت منّك كتير..
خلاس..
حدودك..لامست
وقدلتَ في سكة دواخلك..
ماشة في كل الممرات
كم شاقني في دربك هواك
زادي..إنِّي إليك..مشيت
وياني لامليت مشيك
لاعند الوصول ..قلَّ إشتياقي..ولا إكتفيت
أنا بيك بتحدّى المواعيد الضباب
بنزل مطر
عِزالعذاب
بوفي إقترابك ليّ خريف
وتطلع مواعيدك شجر
وتمسك النيل بين إيديك


ليه..خطاويك اتأخرّت؟
.




.
مرَّات.. ..يجينا..حلو..كلامك
ومرّات..إزور..صوتك..سكات..


مرَّات....تجي..
ومرَّات...تَمِش..
إحنا بي كيفك..نريد..
واحنا بي كيفك..نحِس
الكاتمو في جوَّاك..ببين..أصلو عينيك..مابتغش..
لالا مابتعرف تغش.

بقرا في صوتك سلام
منشور علي حرفو الغمام
متوسِّد المطرة البتدفق
فينا شك..
بين ..
ارتعاش..
في كفة الدايرنو حق..وخايفين يكون برضك حرام.
بقرا في خاطرك ..سؤالي
مرَّة بيعاتب طريقك
ليه بيتعبني ..ودوام..
زايدة فيو سكة سفرنا
وحارمة أشواقنا المنام



ماني خايفة من الهطول
بعشق المطرة..التجيك
لكني خايف..ألقاك..زولا
شايل خدارو ومكتفي..
تنزل مطيرتي عليك..
لاهي تقدر تنسرب..
ولاهي تعشق ..تطفو بعدك.. وتنكفي
خلاس مابشاور إلا شوقي ليك..
لساتو زايد
زي اللي عندك برضو ليّ ؟؟

بس خايفة ماتحمل نزول المطرة في ساعة صفاك
إطلع رذاذ اللهفة ذي كدّر سماك
قلت أبقالك.. غيوم ومرَّات....
أفوت زي السحاب
عشان همومك...شفتو في سماكَ....رهاب ...رهاب..
يشيلني دمعي..ويرتعش
يغلبني ريدك
مرّات .. أقيف.... بي شوق عليَّ بظللك
ومرّات أمش..أخاف الهطول يشغل مواعيدك كمان


خليك قريب.


مابنسدل بعدك ستار..
أصلو بُعدك ..مرهون علي جية مواعيدك زمان
صحيح احساسي بيك..ساكن الروح..والعصب
لكن..بخاف عليك..مِنِّي..لو..بيجيك تعب
بشوييييش..بوصِّلك حد الغيوم.وبكلِّم المطرة توصِّي ليك ريحة الدعاش.

يازول يا باش
قصة ريدك عندي حقيقة وماهي خرافة
قصة زولاً شال الريد جوّاهو فراش
زار الحِلة ودرب البيت البعضك سافر منّو..وبعضك قاعد فيهو وعاش..


!



أصلو اللون ..معكوس من لونك..
وضي القمرة ..
خاتي القال ..سابت لحظة شموسك..
ولو بتشوف في ضلي الشجرة ..

وشوف الناس ..بحر البلد..الساند..شوفك

غالبو ..يكابِر..يقعد..وغالبو يفارق..قيفك