مدونة تماضر الخنساء حمزة

وِدِر طيفي اللي شال الفرحة
سافر..فيك..
مليون ميل..
نزل جوّاك..شوق مرتاح
وقالد في هواك ..نيلين.

قول ليّ أقبّل وين؟
وبعدك كيف يكون الحال
وراك اتغيّرت ازمان
أتاريك كنت ليّ أحوال
دروبك ماشّة في الخاطر
ريحة قهوتك في البال


مشيت منك
مسافة الشوق بيعدي وفات
لقيتك آخر السكّة..مَوَهّط في حنايا الذات
مشيت منك بعيد بالحيل
لقيتك جوّة ساكن الحيل.. انت بتأمر الخطوات
مشيت منك بعيد عنك
لقيتك في مسافة العين ..تشوفك..تذرف الدمعات
تبين قامتك مع النخلات
هناك ..وهناك
تهز أشواقي فيك تمرات
بدسّك من ملامحي البيّ..
يبين صوتك على البسمات
أخاف تمرق في
العيون ضاحكة
سريع إتضارى في الغمضات
أخاف تظهر فيني جنب الناس
يبين رسمك في الوشوش..الجات

بتطلع انت من الشوف..ملامحك باينة في محياي
قول ليّ ..أقبّل وين..
مِحِل قبلت لقيتك جاي
محل مريت لقيتك ماش
بتمرق انت من جواي
يموت شوقك معاي العاش؟
تموت أشواقي..لو ترتاح
قول ليّ قول..ياصاح
كيفن أبيت ناسيك
وتشرق..في عيوني..صباح
كيفن أشوف غيرك..
تبين صورتك..عليو..رحراح!