مدونة تماضر الخنساء حمزة

في الزمن الحكايتو عجيبة مابتدهش
شفتك يابلد دورين
على مد السماء الأغبش
حواليك النجوم أحلام وحلمك ليلو كان أروش
سرق الفرح منك
حزنك..حكاياتك.... شليل جوّاك مافتّش..
صباحاتك هجين الضلمة نور أعمش
ومامنك
من الزمن الحكايتو عجيبة مابتدهش

مشيت منك بعيد عنك ومامني
غلبني أراضي القُدرة لو مافي وتعاندني
غلبني أجيب المافي من قُدرة بتعاندني
أبعد عن طريق..ممنوع..إجيبني عليو وإناديني
أماشي الصاح يكون..مفروض ..أغالط فيو..وإغالطني
أمد للغلط..رأيي..إسوق فيني..وإسمحني
أمد للسمح..رأيي..إرجّع ليَ راي مكسور وإقمحني

قول ليّ كيف الحل؟؟ معاك الكيف ..مجنّني
أظن...مني
بقول ..مني
ومامني
من الزمن الحكايتو عجيبة مابتدهش


يابلد كل ماأشوفك تندهيني
تمشي في عيني الغمامة
تنده الخليتو فيكي
لسّه مديني الملامة
أيّامو ليه بتزيد ضلاما
كلِّميهو...كلِّميهو ..ياحمامة
يرفع الايدين معاكي
تحضن الدعوات سلامة
يابلد شقيانة انتي ..وفيك كم شقيان وياما
قولي للزمن المعاند
بكرة حنصلي المحبة صادقة في كل المعابد
بكرة نرجع لي ربوعك بكرة تتمدَّ الأيادي..المابتخونك
وأي قاعد فيكي حيسالم عيونك وشان عيونك زولو عائد.
ماكان غيابو عشان عيونك..
ماغريبة تجيبو تاني..
ويابلد ..مامنك
من الزمن الحكايتو حزينة مابتدهش.

قالوا لو هدفك سما..
ووصلت لي نُص الطريق حد السماء..
أعرف كمان إنت في نص الطريق للهاوية.

معليش إذا جاوز الاحساس هواك
عدّى فات حد احتياجات الصغار
لي لهفة الام البقت في غفلة من تدبيرا..أم..
خسارة..
ماعِرفت تدارك محنتا..

معليش..إذا سهواً بِقع مِنّي الغُنى
الأصبح ..كبائر..
وكت التلاعب..بالمصاير..
وشاتر زمن لحن الأمان كل الفواصل وبهجتا..

معليش إذا.. خاطرك..بِمُر..عفواً..علي كل البيوتات التغتغت ..بإحتياجك..سُترتا..
والسترة في كل الأحايين..غُطاها..أصلاً فِكرتا.

معليش إذا مِنّي الكلام ..طعمو..الأَمَر..مالِح..عنيد
أصلو الحروف..
وده المؤكد والأكيد
باقية للروح..دمعتا..


أخيراً..
معليش إذا نجمك أفَل..وسط الشموس..الفي كل شارع..إتنين..بيندهو ..عتمتا.