مدونة تماضر الخنساء حمزة

لمّا تشيل أحلامك وترحل
من البلد الفاقدك أكتر
لمّا تراهن ضد الفُرقة
لمّا أشواقك منك تفتر
أعرف إنك لما تفارق
كتير في بُعدك إحنا بنخسر

أعرف انك لسّه موالف
درب البيت جوّاك بيكبر
يملا الروح ..احساسك إلفة
ولما الروح بتوالف..أخطر
ببقى فراقك ..واجعو الحال
هل تفتكر الدمعة بتستر؟
لو بتكابِر ..غصباً..تنزل
أصلو الشوق لي دمعك مَعبر
دربك انت براك اخترتو
فاكر مشيك ليهو بيقدر
لمّا يراودك حزنك فيهو
أوعى يسوقك حزنك وأصبر

أصلو الفكرة رحيلك منك
وهل من روحك تقدر ترحل؟
برضو الواقع إنك فُت
قرارك ترحل كان الاسهل
عشت حنينك بين آمالك
انت حنينك كان الأجمل

يامليان بي صدقك ..صوتك
شايل من جوّاك.. وجايِّ
لو بتفكر قادر ترحل
أعرف انك هسّه معاي
سيب القلتو يعدي خلاس
يكفي الشوق الشلتو براي


لو إتراوح منك ضلّك
شايفو مباري خُطايَّ وماشي
فاكر حِسّك روّح..وعدى؟
لسّه وحاتك فيني ..وطاشي
لسّه بلخبت فيني القُدرة
لسه بِمر بي روحي وغاشي


شيل المطرة وأرحل
أصلو خريفك منك عافي
لمّن ترجع أغزل فرحك
من السحب الرامية عوافي
خلّي الكلمة حنينة بتعرف
وين المطر البنزل صافي
ووين الزول الأخدر جرفو
زولاً ..قاعد فينا..و..مافي
ليه بتعوّد زولك إريدك
باقي كلامك ليهو مرافي
ولمن أبحر ضد الواقع
أصبح بُعدك عنو منافي
ليه بتفارقو وانت معاهو
أهداك الريد أشعار وقوافي
وكلما تبعد عنو سواحل
موسم مدّك يصبح جافي
مابيضيع احساسو الزارك
شكّل فيهو الموج الوافي
أوعى تشيل ياقلبو الحسرة
أصلو الريد العُذري ..خُرافي
فاكر الحِس بنعيشو مَدَسة
فاكر الشوق عن غيرك خافي
سامعو..بردّد إنك واحد
لسّه مَيَقّن.. زيّك ..مافي.