مدونة تماضر الخنساء حمزة

تعرف تعادل الشوق مع قدرة الجيّات إليك؟؟
ولاغاب عنّك ..إنو التلاقي البين غيومك..
بمنح الأرض الرذاذ!

أرجاني في موكب بهاك..
متساربة بيناتك حضور..


جربتا مقدرة الوصول؟؟
حدّ الغيوم..حد اكتمال موسم نداك
هل واجهك مرّة الضباب؟؟
وشلتا من أشواقي ليك..
أهديتو من جوّاك ضياك!
عِرِف إحساسي بيك ساعة الوضوح
ساعة تمكُّن مشتهاك.

وافيني يوم تعدم غياب
تتحكّر اللحظات علي موعد مجيك
أبقى ملهوف ليك كتير
إنتا ياحِس الرباب
شديت رحالي وجاي عليك
ماخفتا من سكة سفر..
فيها إحتمالات العذاب..
لكني خايف يوم أجيك..
وأنا في اكتمالات الوصول..
ألقى الخريف ..موسم سراب..

 إتوخّى برضو الاحتمال
وأعرف كمان إنو الغياب
مشدود علي وتر ارتحال
مرَّات بصادفني وبجيك
ومرَّات تفوت مواعيدك تمِش
وأنا حالي لسع مندهش
لسه مستطعم مجيك
في حلقي..حسّك..مرتعش
وإتسرّبي..
يالحظة شالت صوتي ليك
إتسرّبي..جوّة المسامات وأدخلي
وإتمكّني..من الموانع ..وأخطري..
جوّة الشرايين..حومي ياخي إتدفقي
ماتبقي زي لمحة عتاب
مابية التواصل ..وأفرحي
أنا أصلي لو بسمع عتابك
ماكان مواعيدك ..رحيل..
لا كان براحاتك أنا.

ماهو طيفي الجاي إليك
لكني لملمت الحلم..
غمتو في كف الرياح
قُت ليها شيلي وبعثري
أصلو الواقع أحلى وبي كتير
حقيقي جاي عديل عليك..
تقدر تشيل قدرة الجيات وشاح
يغطي بي لونو الشفق
يهدي أرواحنا السماح..
والجية زي لحظة غسق..
بتقدر تواكب روعتك؟؟
تقدر تعيش الاندهاش
وكتين تصادف حتتك
أوعاك تشيل مرّة الظنون..
وتخاف مواعيد الطشاش
أنا قلتا ليك
مواعيدك خريف
بتصدق المطرة الوعود
والأرض تسكن ارتعاش
بستقبلك بين المسام
يامطرة برضو إتسرّبي
فيني قدرة إحتواك
جوّايَّ حومي..وأقدلي
كل البراحات تشتهيك
لمتين تجيني وتهطلي.