مدونة تماضر الخنساء حمزة

قلتا ليك الريد حقيقة..
غطّى المساحات اليباب
وقلتا ليك قلبي الوهبتو
عمرو مابهدي العذاب
لاهو خان زولو البريدو
ولاهو من تشواقو ..تاب
والمحنة الفي عيوني
بكفيها من شوفتك رهاب
ماني عارف ليه غرامك
لسه مرهون السراب!

ماإصطفيت غيركم ولسه..
برضي هايم في غرامكم
وفي عيون ماليانا عِزة
كاتلة بي أطرافا زولاً
موتو بي نظراتا لِذة
وماإصطفيت غيركم أحبة..
ولو وِصالك لينا عَزَّ
نحنا بكفينا التمنِّي
في خيالي ألقاكا هسّه
وإنتا متوسِّد مكاني
والمكان بي شوقو..حسَّ
إحتواك بي لهفة ..برضو..
في عيونو هواكا..قصّة

وكل كلمة ريد تقولا
شايلة من قلبي العذاب
إحنا لو صادفنا شوقك..
نروى لو شفناو رهاب
ونزرع الكلمة الجميلة
تنمو في وسط اليباب
حد الأحاسيس الخرافة
حد إكتمال حِس الرباب
ترقص الخضرة اللي فينا
بي مواعيدك ..حباب


قالوا في حبك أغاني
وقلتا حبك هو الشجاني
وقالوا بين عينيك بعيشو
وقلتا ببعث فيها تاني
إحنا ماقاصدنو هجرك
إنتا ياالساكن حناني
ولا سعينا نزيد عذابك
وإنتا ريدك هو الشقاني
راضي بي التعب المعاك
غالي ياالقلب الأذاني
عارفو شايل شوقو ليَّ
عارفو طيِّب وبرضو حاني