مدونة تماضر الخنساء حمزة

وطن

ربع أبنائه فى السجون ..
وربعٌ ثانٍ مُهَجَّر ..
وثالث...سمَّى نفسه قسراً إمامنا ..
وربعٌ أخير ...مُتَهمٌ بالجنون !

تفتش عن وطن حقك
وماسويتو إنتا براك
بس مستنى من بعضك
إلملم بعضو إبقى حِداك
ولاك شايل سلاح ترهب
ولاك بتهدِّد إبقو معاك
بس شايل فى إيدياتك
عشقك لى سما الخرطوم
وصوت الساقية فى بلدك
إدوزِّن فى مسافاتك
البتفصل بين خطاى و..خُطاك
تفتش عن وطن مكتوب
على الرملة ..ووصِّى الموج
بشويش ..

( عليك إيدياتى)
( عليك حبى لوليداتى )
( عليك الشفتو فى ريدك )
( عليك دم الوليد السال ..ونشَّط حلمى فى وريدك )
لاتمحى حروفو بالله
ولو أمكن ..
تخت فى ( واوو ) مصلايتك
وتحمل ( طاءو ) مخلايتك
وتسكِّن ( نونو ) فى سعناً
توزِّع فيهو رحماتك
وبعضاً من هديماتك
تشيلا وتجرى بى فرحة
تهدى نحيب جنياتك
وتكسيهم هديمة
وتديهم لقيمة
مامغموسة فى ذلة
ولان مشترطة بى ( إلا
بس ممدوة بى إلفة
ويااااه
لمَّا الحنان إصبح ..مهنة بالحرفة


جيت أحلفكم ..
وكت حافظين كتاب الله
قدر ماتروح رويحاتنا
تنط الصرخة فى حلوقكم
بشِّر.. جرتقوك بالدم
دا ماميِّت ..
كبِّر ياحبيب الله
غبيتو العرفة فى الله ؟؟
قدر ماتاكلوا أرزاقنا
تقروا وراها آياتكم
زى منسوخة من كتباً نزلت بس لأوكاتكم
إحنا العرفة ..ماغِبتنا
وحاة الجانا من الله
وإحنا القلنا فى صلاتنا
( سراً )
أريتكم إنتو تستهدوا
أريتكم لحظة لو تهدوا
أريتكم تقروا قرءآنا
كنتو عرفتو وين إنتو
فى كم آية ..موجودين
صفتكم ...حليلا الليلة أوصافكم
وعذابكم ..ياالله متين حيتهدوا ؟؟
ونتشهَّد..
وإحنا برانا فى خلوة
وندعو ونبكى للمولى
وإحنا البينا لاحولا

وفجأة تجونا من مافى
( جهراً )
تقروا علينا دعواتنا
وكيف عادينا حكامنا
إحنا عقلنا متعافى ؟؟
واحد مننا معاكم ..
إمَّا يكون ..هو خلوتنا ..
أو يا وطنى يامفجوع ..
أخاف إن قلتا دعوتنا !!


وجيت مُكبَّل بى هواي
الغلطة كانت هيَّ ريد ..
وكيف أريدك بس براي
وكيف أقول إنَّك جريح
وكيفن أصرخ ..ديك دماي
أصلو قالوا ..
داك شفق ..ساعة مغيب
وزى بقولوا ..
موقفى.. أصبح صعيب..
أصلي ماسامع كتير
مش قلتا جيت ؟؟
لالا فتا ..ويمكن أظن إنى المشيت
برضى مافاكر كتير
وإشتقتا لي زولى البعيد
مرَّات أرتّب صوت مشيو ..
ألقاهو ببعد ..وأنا البجيو
ومرَّات أظن قرَّب كتير
أخاف عليو وجع المصير ..
خطية صبحت ..الزول يريد
وآخ من الخطية
لو أغوتك مرَّة الظنون
وردتا بلدك بى جنون


غيَّبوك الهُم ..
ماعرفوا إنَّك في ..
مشدود ووترك هم
مصلوب على التُمتم
دمَّك بينزف حق
وروحك وطن بتضُم
وماعرفوا إنَّك في
ماشافوا أخواتك ..
بيضاروا فى رفاتك
شان بالحنان إتلم
لاشافوا أمك جات
وحليبا لون الدم
تسقيك محل النزف
إبرا الجرح وإنجم
وماشافوا بذراتك
فى عيون وليداتك
بتصر وجع ..وتخم
راجين والأمانى وقوف
تشق بطون الخوف
وتكتل الدجال
وأخر زمانو إتم