الحياة | انا و فالح

كل ما يتعلق بالحياة بمختلف جوانب الحياة وخاصة المرأة

انا و فالح

10 نيسان, 2009

تأثرا بفليح همسه حبيت احكي عن حكايتي في سوق الزواج طبعا حكايتي مع خليني اسميه فالح حكايه فيها نوع من الدراما والكوميديا خاصه ان كان فالح من الاقارب رح ابدى اليوم مع عاده يمكن لهلا موجوده هو زيارة الام والاخت للبنت المرغوب فيها طبعا في يوم وفي الساعه 10 الصبح وكان يوم بعد يوم روحه على الجامعه وصاحبتكم كانت لساتها صاحيه من النوم وتحكي يا صباح يا فتاح طب والباب بيدق انا حكيت لامي شو اليوم عندك الضيافه طلعت امي وحكت لا ما حكولي النسوان انها عندي
حكيت طيب شوفي مين وانا رايحه احضر فطور حكت طيب بعد خمس دقايق اجت امي تحكي حضري قهوة طلعت في امي بعين نص نايمه وحكيتلها مين عنا ؟امي هون وبضحكه فيها انشراح طلابين يما
هون ومن دون وعي باحكيلها بالله لمين يا حبيبتي هون امي بتحويثه طبعا لامي يما يعني لمين ؟حكيت لامي احكيلهم يروحوا يدحلوا ويحلوا عني هون امي بلشت عينيها تضرب شرار وبصراحه خوفتني حكيت خلص يا سوزان كاسه او صحن على راسك هلا
يلا تحركي بلا خفة دم مش مطلوبه طبعا وكالعاده عضي على لسانك يا سوزان حكم القوي سويت القهوة وغيرت البيجاما ولبسنا اللي على الحبل ودخلت وكان جاي على بالي اكب القهوة على روسهن والله
هون الام طبعا اهلا وسهلا يا حبيبتي اهلا وسهلا جنبي يا عمري طلعت فيها وابتسامه صفرا اهلين خالتو وبلشت طبعا بوصف كامل الاوصاف
وبعدين حكتلي حبيبتي اي ساعه تصحي طبعا امي لقفت السؤال علشان انا ما عك حكتلها تصحى والله من الصبح بس في ايام الاسبوع لانها بتروح تيجي على الجامعه تصحى متأخره لانها تعبانه انا هون بطلع على امي يعني لايش التقرير المفصل بس سكري تمك يا سوزان من شان الاجانب
وبعدين السؤال الكبير انت بتصلي يا حبيبتي امي برضو والله كل فرض بفرضه يا ام فالح بعدين اجا السؤال اللي كان الهدف وحكت انا ابني بحبيش المره اللي تشتغل طبعا انا هون وقبل ما امي تحكي حكيت ليش يا خالتي
طبعا الام وبانشراح مش عارفه من وين جايبته لانه بحب يستت مرته ويهنيها وبعدين لدير بالها على الاولاد هون حكيت أه
بعدين بتحكي يما انت ما بتوكلي ليش هيك ضعيفه انا ابني بيحب وحده مليانه طبعا وكالعاده امي يا ام فالح هاي بتروح وبتيجي على اربد على الجامعه وبتعرفي مشوار وغير المشي اللي في الجامعه
وانا قاعده نفسي احكيلها يا عمي حلي عني انت والنضوة تبعك جعان بدي اروح افطر وبعدين تسألني وتحكيلي انت يا حبيبتي تلبسي جلباب حكيتلها على الجامعه بس والله طلعت فيي وبتحكي انا ابني بيحب مرته تلبس الجلباب وين ما تروح قلتلها والله انا بس بلبسه في الجامعه
امي هون صفرت واحمرت ليش احكي هيك بس يلا مشتها امي وهي تغلي
بعدين شربت القهوة وحكت اسمحولنا وطبعا بتسلم علي وبتحكي ان شاء الله بس ييجي ابني رح تشوفي شب ولا منه حكيت ان شاء الله يا خالتي مع السلامه
امي ها يما شو ؟طلعت في امي وباحكي في شو شو
رأيك المره اعطتني رقم تلفونها من شان نتصل فيها ونحكيلهم ييجوا
حكيت لامي لا ما بدياهم ييجوا امي هون تطلع فيي بدها تخنقني ليش يا برنسيسه ابوكي عرفت انها عصبت ابعدت عنها مسافه بديش صحون طائره تهد على راسي اولا اجو من دون موعد ومن الصبح بكير الناس اللي عندها ذوق تستأذن قعدت امي على الكرسي وثانيا يا ستي شروط وطلبات كثيره جلباب وعدم شغل والله يعلم بس يشرف شو كمان حضرته بده لا ما بدي وبعدين ليش ما هو اجا ولا لازم الاوكي من النسوان يعني
امي حكت هيك العادات يا فالحه وبعدين اجو من الصبح ليشوفوا البيت اذا مرتب ونطيف ولا يوخذه رمه يعني وبعدين الزلمه من حقه اذا بده مرته تشتغل ولا والزلمه مقتدر يصرف عليها فليش تشتغل
يما انا ما بدي وخلص انتهى يا امي هون امي والله ما مقوي عينك الا ابوكي أخ منك ومنه اتسممي

بواسطة sozan 16:01 | My life | تعليق(3) | الرابط الثابت

تعليقات

هههههههههههههه

من الآخر جد؛ ذكرتيني بنقد أيام زمان لما كانو يجو عالساعه سبعه الصبح عشان يعاينوا العروس قبل ما تتزبط

وحلوه هاي جعان؛ بتذكريني بحالي لما أكون بلعب بالخاتم والناس بلشانه:)
بس والله انك جريئة بهالردود على عريس الهنا وشروطه

وبدك رأيي؛ اللي بيحكيلك من أول أريحلك ما يضلهم رايحين جاي وشاغلين بالك

ميّاسي | 10/04/2009, 17:42 [ الرد ]

أهلين ميسو
والله يا ميسو القوة اجت من بعد البلاوي اللي شفتها
انا كنت في عمان الشرقيه وين الناس لسه في عندهم عادات القرى يعني في اشياء كانت تصير معي كنت احس حالي بدي انخنق منها وطبعا كله تحت مسمى بدنا عروس لانه بنت محكوم علي انقبل اي شي من الناس يعني الحمدلله اني تخلصت من هالمرحله

sozan | 10/04/2009, 19:39 [ الرد ]

هههههههههههه....عجبني فالح :)
هاي جديده يجو من الصبح وبدون موعد.

بعدين ابني بده مرته وابني بده مرته, عاساس خلص انت طبعا موافقه و مستحيل ترفضي العريس و عاساس انت ما صدقتي انه اجا واللي بده اياه اوامر حتكون المهم رضاه.
هاي مشكله العالم بفكرو البنت بدها تطير بالسما بس يجي ابنهم يطلبها.
الحمد لله انك خلصتي من وجعه هالراس, والله يصبر اهلنا علينا :)

whisper | 10/04/2009, 22:44 [ الرد ]