الحياة | تخاريف

كل ما يتعلق بالحياة بمختلف جوانب الحياة وخاصة المرأة

تخاريف

21 آذار, 2009

كانت تجلس في زاوية المسجد تسبح فقررت ان اذهب هناك خاصه ان عدد من المساجد في امريكا لا يوجد فيها فصل بين مصلى النساء ومصلى الرجال وان وجد فلا يكون منفصلا فهناك امكانيات لفتحه كما هو الحال في المسجد الذي نذهب اليه لهذا دائما احبذ ان اجلس في الصفوف الخلفيه وهناك كان جلوسي بجانبها
امرأة كبيره في العمر قد تكون في نهايات الخمسين او بداية الستين كانت صامته هادئه الى ان جاءت احدى صديقاتها فكان الحوار الذي سمعت
السلام عليكم يا ام اسماعيل
وعليكم السلام يا ام محمد كيف الحال ؟
ام اسماعيل :ايييييييييه نحمد الله ونشكره
ام محمد :لا يحمد على مكروه سواه
ام اسماعيل :شفت يا ام محمد ماتت رفيقتنا الله يرحمها ويحسن الها
ام محمد:الحمدلله انها ارتاحت من مرضها اللي ما يتسمى وطبعا ترفع جزء من ما يتدلى من الحجاب وتف وتحكي يا لطيف يا لطيف
ام اسماعيل :صدقت ارتاحت والله بس ان زوجها ساقط عرفت شو بده يساوي
ام محمد :شو بده يساوي والله ما ادريد؟
ام اسماعيل :بده يتجوز يا حبيبتي والمره ما الها 40 يوم متوفيه شايفه مش قادر يستنى من شان هالمسكينه اللي مضت معاه سنين عمرها على الحلوة والمره بلاش هي من شان اولادها ول شو شرش الحيا طق
ام محمد :طيب شو فيها لو تجوز هذا حقه وبعدين والله ان قام فيها وهي مريضه تتذكري آخر ايامها يا بنت الحلال كان ينظف عليها وبعدين الزلمه صبر 6 سنين شو مهوي بني آدم
ام اسماعيل :ايوه وقفي معاه وقفي شو بده يصير في اولاده آه صدق اللي قال الام بتلم والاب بيخم
ام محمد :يا ام اسماعيل اولاده كبار ما شاء الله بيقدروا ديروبالهم على حالهم بس مين بده يقوم بهالزلمه ولا تنسي ان بناتها ولوما موتت امهن ولا كان يزوجن الشهر هاد
ام اسماعيل: مهو هذا اللي كاهرني يعني هسه بده يتزوج واولاده بسن الزيجه يستحي على حاله
ام محمد :اسمعي الزلمه بده مره من شان تقوم فيه وتعينه في وحدته وخلص لا تضلي تحكي على الزلمه سيبيه هو حر
ام اسماعيل :يا ختي هو حر هو حر بس الشغله بدها فهم
طبعا كان هذا الحوار طوال فترة الخطبه وكل واحده تظن ان صوتها غير مسموع لم اسمع من الخطبه الكثير غير مقتطفات منها وفهمت الموضوع بشكل عام
وفي النهايه من حقه ان يتزوج ولا يوجد نص شرعي في القرآن يجبره على الانتظار اربعين يوما وفكرة الاربعين يوم هاي من ايام الفراعنه لا هي من دينا ولا هي حتى من عاداتنا
والامر الاهم متى ستعلم تلك النساء ان الحديث او حتى الايماء بيدك يبطل صلاة الجمعه وام محمد وام اسماعيل بيحكوا قصص بس متى

بواسطة sozan 19:41 | عام | تعليق(6) | الرابط الثابت

تعليقات

اللهم صلي على سيدنا محمد ..عدي معي
غيبه..حكي اثناء الخطبه.. احتمال كبير بهتان
وبالمسجد..يعني هدول لازم يتستو على نار هاديه لتتفشفش فشاتهم..
طبعا غير التخلف تبع الاربعين يوم.. قال هههههههه قال الأمر من هيك انو التانيه قاعده بتدافع عن الزلمه وانو حرام تحكي عنو هيك اما هم انسطل المسجد بصوتهم ولا كأنو صاير شي.
والله هو احسن شي النسوان يضلو ببيوتهم يصلو زي عنا احنا الشباب مع ابوي عالمسجد وامي شغاله بالفولات والحمص. :)
وتاني شي حبيت احكيلك بتشرف بزيارتك بالبلوج الجديد www.anosyat.com :)

anas | 21/03/2009, 21:48 [ الرد ]

أهلين انس
شو بدك تحكي والداهيه لما الواحد يحكي ما بيعجبهم
لا اكيد اتشرف في زيارتها واضيفها كمان عندي اهلا فيك في عالم التدوين

sozan | 21/03/2009, 21:54 [ الرد ]

ما عندي اي تعليق بس هادا للتوضيح ان انا انس اللي بحكي في السياسه ومش انا اللي كتبت التعليق الاول . مشان تفرقي بيناتنا انا دايما رح اكتب اسمي بالعربي ..

انس التاني | 21/03/2009, 22:19 [ الرد ]

تخاريف من خرّاف صح؟
انتي كأنك كل جمعه بتروحي تصليها بالجامع؟

نيّالك:)

ميّاسي | 22/03/2009, 00:26 [ الرد ]

أهلين ميسو :)
صح
لا والله مش كل جمعه بس هي وسيله لاحس بهااليوم الفضيل واحيانا كثير بانبسط لما اروح لانه كثير بتعلم عن المسلمين العرب او المغتربين والمسلمين من اصل امريكي اللي كنت اتعامل معهم في كاليفورنيا وعن جد بتلاقي فرق كبير

sozan | 22/03/2009, 14:49 [ الرد ]

أهلين أنس
عرفت انه مش انت لانه مش هاي طريقتك في الكتابه واهلا سهلا فيك مره ثانيه بيشرفني انه تقرأ مدوتني

sozan | 22/03/2009, 15:12 [ الرد ]