الحياة | ضريبه بعين الحسود

كل ما يتعلق بالحياة بمختلف جوانب الحياة وخاصة المرأة

ضريبه بعين الحسود

08 كانون ثاني, 2009

ضرائب جديده مفروضه على المواطن الاردني من اجل مساعدة الثروة الحيوانيه وذلك من خلال اضافة فلس على كل من فواتير الكهرباء وفواتير الاتصالات وتم فرضها من قبل البرلمانيين الافاضل

في كل مره اتصل بوالدتي تبدأ بالقول والله يما كل شي مثل النار لهيك ما دفعت فاتورة التلفون هيهم بدهم يفصلوه هلا مع الفلس الزياده شو بده يصير ؟؟

هو سؤال بده اجابه يعني خلينا نجرب نعطي هالنواب الافاضل راتب الشهر للموظف العادي اللي معدل اسرته اربع افراد وهذا اقل عدد افراد اسره في الاردن ونسلمهم الفواتير التي يجب دفعها ومن ثم نبحث في موضوع المعيشه ما يمكن هيك يحسوا !!

السؤال الثاني يعني ما عرفته تتشاطروا الا على المواطن طيب ما كان حكيته انه كل نائب بيتنازل وبشكل شهرى عن ألف دينار لمدة سنه كم من نائب في البرلمان الاردني اللهم صلي على النبي 40 نائب في عين الحاسد يعني كل شهر 40 الف في السنه كم شهر فيها 12 خلينا نحكي قريب من نصف المليون في السنه هو بلا كم من بني آدم عنا بالاردن عنده ثروة حيوانيه او مزرعه ما بكفوا هالنص مليون !!

بعدين كمان سؤال لاصحاب الثروة الحيوانيه اللي كل سنه بيعيطوا واللي بالاغلب هم أصحاب الخرفان البلدي اللي سعره يمكن يتجاوز 150 دينار انته شو بطعموا غنمكم ليكون جبنه كيري وانا ما معي خبر لحد ما كنت انا في الاردن كنت اشوفهم يسرحوا في الغنم في املاك الحكومه يدوروا على مرعى واللي ما بيطلع يدور كانوا يلفوا على الزباله يدوروا على خبز ناشف او خضره غير صالحه للاستهلاك البشري هلا صرنا بدنا دعم !!

بعدين كمان سؤال معلش انا عارفه انه نواب مشغولين كثير مش فاضيين حتى يفتحوا النت هاد اذا بيعرفوا طبعا ليش ما ناقشته التأمين الصحي او الرواتب او تعديل قوانين خاصه بالعماله او العمل او او ولا الضرايب اسهل حل ؟!

تذكروا لما حكيت انه الناس ما بدها نواب روحوا على جريدة الغد واطلعوا على الخبر وشوفوا المعلقين شو كاتبين ؟ عمليه سياسيه لناس ما تعرف شو معناة العمل السياسي لصالح الشعب بدهم الحكومه تدعم كل شي وما بدهم يتنازلوا عن اشي حاربوا مثل الوحوش من اجل الامتيازات ولكن من اجل المواطن اللي أخذوا هاي الميزات من دخله فرضوا ضريبه جديده مش هاي الاصلاحات اللي احنا بندور مزيد من الضرايب على الناس العاديه في حين في دول العظمى لما شافت اقتصادها بلش يتخلل صاروا يفكروا بفرض الضرائب على الشركات الكبرى واللي بتحقق ارباح هائله بس كل اللي بطلبه من الناخب اتعلم ...اتعلم ...اتعلم

بواسطة sozan 19:42 | عام | تعليق(2) | الرابط الثابت