الحياة | المفضوح مفضوح

كل ما يتعلق بالحياة بمختلف جوانب الحياة وخاصة المرأة

المفضوح مفضوح

02 كانون اول, 2008

المفضوح مفضوح تلك الكلمه التي طرأت على لساني حينما قرأت عن جريمه بداعي القرف اوه ..."الشرف"

الفتاة تزوجت من شاب كانت على علاقه به قبل الزواج واكتشف الاعمام انها كانت على علاقه به بعد الزواج يعني مش ينطموا يقعدوا لا شو ما في قانون نستفيد منه ونخلص منها يلا مرأة بلا منها أصلا لايش النسوان موجودات مش مشان نثبت رجولتنا

الفتاة كانت مقدمه شكوى عند المحافظ انه اهلها من اعمامها يريدون قتلها الا انها ارادت التنازل عن القضيه لان والدها زارها وطالبها بالتنازل فذهبت هي ووالدها وزوجها وقبل الدخول الى مكتب المحافظ أخذها والدها لتقابل اعمامها وهناك تم قتلها وفي النهايه الحبس 7 سنوات يعني والله حرام ليش 7 سنوات كان لازم يطلع من اول يوم مهو كان زعلان ومعصب فعشان هيك لما شافها ما قدر يتحمل الدم غلي في عروقه وضرب فيوزات مخه وما خطط لقتلها لا هو ولا ابوها ولا حدا يا جماعه مسكين هالرجال حرام لازم ياخذ براءة لانه هاي مرأة ناشره للرذيله

الى متى هذا القتل الغير مبرر والمشروع باسم القانون الى متى ؟ يعني الفتاة تزوجت وارتبطت مع الانسان يعني خلينا نحكي بلغة ستي انسترت لايش القتل لا وفي النهايه حكم 15 سنه وتخفف الى 7 للتنازل عن الحق الشخصي واللي بيكون حق مين ؟ الاصل كان اعدام لانه قتل عمد لا شو قتل عمد الزلمه عرف بالقصه قبل يوم من الحادثه أها يعني معاه حق شو قتلها وغسل عاره يعني هلا شرفه الرفيع رجعله

صراحه انا بطالب جلالة الملك انه ريحنا من النواب وهو يختار المجلس كله لانه وبصراحه احنا عالم ما نستاهل النعمه وما بنعرف نختار ويمكن الملك يتفق معاي في هاي لانه الاغلب اذا مو 70% من النواب تم اختيارهم على اساس عشائري و30 %على اساس ديني يعني ولا واحد تم انتخابه لانه المنتخب حاسس انه هلانسان بيفهم فمن شان الله يا جلالة الملك ارحمنا منهم وانت اختار لانه ما بنستاهل صدقني قال بدنا ديمقراطيه هاي حداثه اما قانون يحمي النساء من القتل المنظم تحت مسمى الشرف لا شو مش لهدرجه الحداثه يا عمي هاد اسمه استهتار من شان الله يا جلالة الملك ريحنا منهم

قوانين رادعه للمشكله مو موافقين عليها اما منظركم قدام العالم على انكم عالم متخلفه راضيين فيها وتعاليم غير موافق عليها بالقرأن وبعدين يعني هلا البنت بس اللي تستاهل القتل بس انا يمكن فهمت اللوجيك تبعها انه القاتل ما بده يتحاكم لانه لو قتل البنت والشب هيك رح تكون جريمه تدخل فيها عائلتين وهيك معناته وحسب الاحطام العشائريه اللي عنا ترحيل وديه وبساط بعرفش شو ومن هالحكي اما البنت انو اللي بده يطالب يعني مراجل على الضعيف بذمتكم هاي مراجل وهاد اسمه حماية المجتمع من الرذيله ولكم فلقتونا بتسميات ما الها معنى من شان الله يا جلالة الملك ارحمنا من النواب

هاي الصورة المرفقه مع الخبر يعني بتوقع انها صورة مسلخ بس اتخيلوا المراد من الصورة

بواسطة sozan 17:04 | عام | تعليق(4) | الرابط الثابت

تعليقات

على الرغم أني متفق معك في موضوع انو كل عمامها مع ابوها لازم يروحوا إعدام

إلا أني بقولك روحي أحكي باللي بتفهمي فية و لا تطلبي طلبات بايخة بإسم الشعب

على الرغم من الديكور الديموقراطي الشنيع في الأردن إلا إنوا بضل أحسن من مفيش

لكنك اثبتي أنك عربية أصيلة و انك بتفضلي زي كل العرب انكم تساقوا كالغنم على المسلخ

عمر قعدان | 03/12/2008, 08:13 [ الرد ]

أهلين استاذ عمر
اولا باشكرك على الموافقه وعلى الاختلاف هلا بوضح الفكرة
الشخص الذي لا يعلم اهمية الحق الممنوح له لا يحق له بمزاولته وهذا من وجهة نظري لما كنت في الاردن كنت انظر الى اليافطات الاعلانيه للنواب لم اكن ارى كلمة مواطن ولا برنامج انتخابي كان الكلام موجه الى ابناء العشيره او يحطوا الاسلام هو الحل من دون اي ذكر لخطط مفهومه ولما يوصلوا البرلمان بتصير كلمتهم الك ابقى قابلني والمشكله انه ما تعلمنا ومنضل ننتخب باسم العشيره مش باسم انه هاد الاسم رح يقدم شي الي كمواطن والادهى من هاد كله انه ميخدين الشغله كانه الهم الحق في كل شي بدهم سيارات غير مجمركه تراخيص حج زياده في حين انه ناس ماتت وهي تحلم بالحج وهلا تحكي انه انا بحب انساق جد انساق بانسان عارف شو بيعمل ولا انساق بانسان جاهل كل فكره على زمان الجاهليه
وفي النهايه باحترم رأيك وبقدره وشكرا الك

سوزان | 03/12/2008, 16:20 [ الرد ]

يعني اللي حكيتي صحيح بس اللي رفعوا شعار الغسلام هو الحل هم الوحيدين إللي نشروا برنامج إنتخابي مطبوع في كتيب ما كان تفصيلي كثير لكنهم كا نوا احسن من اليسارين والقومين و الوطنيين و العشائريين في الإنتخابات في العشر سنين الماضية و هم الحزب الوحيد اللي إلوا قاعدة شعبية بتضم كافة الاطياف و الاصول بالبلد

عمر قعدان | 04/12/2008, 07:02 [ الرد ]

وانا معك في هاي الا اني كمان لا اتفق على كيفية الطرح في برنامجهم الانتخابي وهو العموميه لان التعميم بيكون خاطيء والاهم من هذا كله يعني انا بتذكر انتخابات في التسعينات وهي الانتخابات الوحيده اللي الوالد والوالده انتخبوا فيها ونجح حمزه منصور يومها كان في جلسه برلمانيه خاصه برفع دعم عن ماده ولما اجا دور حمزه منصور حكي عن قضيه حنيش الكبرى يعني مين الاولى في حنيش ولا الشعب الجعان من يومها والدي حالف يمين ما ينتخب حدا بتوقع انت فهمت انا عن شو باحكي قبل ما نطالب باصلاح حال الغير نصلح حالنا وهاد من منهج نبينا عليه الصلاة والسلام وكل عام وانت بخير

سوزان | 05/12/2008, 05:33 [ الرد ]