الحياة | حايصه لايصه !!

كل ما يتعلق بالحياة بمختلف جوانب الحياة وخاصة المرأة

حايصه لايصه !!

20 تشرين اول, 2008

فكركم الناس رح تتفهم وضعي !! اخي رح يكتب كتابه على بنت ابن عم والدي والآن مطلوب مني اني اقدم هديه وبصراحه ما معي ابعت يعني المبلغ اللي قدمته لاختي وخايفه ابعت اقل أخوي ياخذ على خاطره والمشكله انه هو ما بيحكي بس بحط في قلبه يعني شو اعمل والبلوة انه هاي اول فرحه اله في حياته وامي حاطه في بالها اني رح ابعت مبلغ منيح وهي هيك مفهمته يعني والله مش عارفه شو اعمل!!

وانا كنت حاكيه لامي انه زوجي هلا ما بيشتغل وهو طالب بس شو تحكي ذكرتني والدتي بالمواقف البايخه اللي كنا نشوفها من الناس لما كنا نيجي من الكويت كانوا ياخذوا كل شي معنا حتى ملابسنا بتهمة انه ابوي في الكويت ويا عمي انت توكلوا المصاري أكل ما معهم خبر انه الواحد بيهلك تيطلع الفلس والله كنا نرجع ما معانا الا الملابس اللي علينا والسبب طبعا امي !!

وهلا شو اعمل انا عارفه اذا حكيتله رح يبين حاله متفهم الا اني جد مش حابه يحس انه انا ميزت بينه وبين اختي لكن شو اعمل في هديك الفتره كان زوجي في عمل في الصيف خاص بتخصصه كان ياخذ راتب وهلا ارجعنا على القروض اللي بياخذها من الجامعه شو اعمل هلا انا!!

من فتره كنت احكي مع بنت حماها لاختي كانت بتلمح الي انه انا لازم اجيب لاختي هديه محرزه لاني من اهل امريكا وهدول الناس بيلموا المصاري من الشارع والله جد والله جد على هاد الحكي كان بوش ما أخذ فلوس الناس اللي تدفع الضرايب وحطها لوول ستريت بس الناس هاي تقرأ ولا حتى بتشوف أخبار !!

يعني هلا الناس كلها من بره بيلموا المصاري طيب وانتوا شو بتلموا ياختي !!

عن جد يومها نرفزت وحكيت لامي شو هاد !حكت امي اسمعي وحطي بالخرج انوا خرج هاد اللي من كتر اللي فيه انفجر !!وهلا انا حايصه لايصه شو اعمل يعني انا عارفه لو حكيت لزوجي رح يبعت لانه ما بحب يزعلني بس والله مو هاين علي اضايقه والله صايره فيه متل ما حكي طارق بن زياد زعل اخوكي من امامكم والضيق على حالك وزوجك واولادك وختاري يلي تعرفي تختاري !!

بواسطة sozan 03:11 | عام | تعليق(7) | الرابط الثابت

تعليقات

بدك الصراحة؟ حالك من حال 99% من المغتربين. و افضل حل برأيي الشخصي الصراحة و الشفافية مع اخوكي قبل كل الناس
خبّريه بالحال.. و الله يعين الجميع
انا متأكد انه رح يفهم و يقدر و يعذرك. و لمّا يفرجها ربنا .. بتبعتيله شغلة
لا يكلّف الله نفسا الا وسعها..

Qwaider قويدر | 20/10/2008, 04:15 [ الرد ]

احكي لزوجك عشان هو أدرى باستطاعته مو انتي ...لأن الرجال عموما بيكونوا شايلين فلوس على جنب لأي طارئ ...

ولو مو شايل هذا رجال أقدر منك على التصرف بهيك أمور ...

احكيله ووكلي امرك لرب العالمين ..,ما إلك الا اللي يبيض وجهك عند أهلك وأخوكي ان شاءالله

دندونه | 20/10/2008, 04:20 [ الرد ]

"لما كنا نيجي من الكويت كانوا ياخذوا كل شي معنا حتى ملابسنا "

لوووووووووووووول .. نفس اللي كان يصير معنا لما كنا ننزل عالبلد .. الناس بيفكرو ان احنا في اميركا بنلاقي المصاري بالشوارع .. مش عارفين ان اقساط الجامعات والكردت كارد ماصه دمنا عالاخر .. فعلا على قولة امي الله يرضى عليها "احنا مضروبين بحجر كبير عالفاضي" ...
انا السنه لما انزلت عالبلد حضرت عرس ابن عمي والاخ كان بيتوقع اني انقطه عقد دولارت .. بس انا ما فرق معي ونقطتو فقط 75 دولار .. طبعا عمي ومرة عمي والعريس والعروس زعلو مني .. بس انا كبرت دماغي وقلتلهم ازا مش عاجبينو يرجعلي اياهم ان اولى فيهم .. ارضاء الناس غايه لاتدرك

أنس | 20/10/2008, 04:35 [ الرد ]

أمر عجيب و غريب، أنا تربيت تربية فلاحية إنو الأخ هو المسئول عن أخته، و إنو عيب الأهل يوخذوا شيء من بنتهم بعد الزواج، و إنو الأهل مجبورين في بنتهم بعد الزواج إذا أحوالها مش و لا بد، يا أختي إنتي عايشة في غربة و زوجك مديون و ما عنده راتب و لسه بتفكري تسأليه و لا لأ؟؟ طبعا لا تسأليه. أخوكي زلمة و ما بيصير يطلب هساعدة من أخته المتزوجة و ما بيصير يزعل إذا ما ساعدته، و إذا هو مو قد مصاريف الزواج بلاش منه هسه و يستنى لحد ماا يصير معاه مصاري.

الحق المر | 20/10/2008, 05:50 [ الرد ]

هيدي مشكلة كل المغتربين ، لأنو الأهل وألأصحاب بيفتكرو انو كل شي بهالبلد بيجي بالسهل ..
أنا مريت بمشكلة متلك بس كنت صريحة وقلت انو الظرف شوي صعب ووعدتهن انو لما كون انشالله قادرة ما رح أتأخر أبداً ..وبالفعل بس الله فرجها معي شوي بعتت هدية محترمة ..
ما بعرف، بنصحك تكوني صريحة وانشالله أخوك بيتفهم وضعك ، لأنو مش بس زوجك مش عم يشتغل بالوقت الحاضر ، كمان عندك ولاد ومسووء لية والأوضاع المادية صعبة بكل الدنيا ..ومبروك لأخوك والله يهنيهم .

Noura | 20/10/2008, 12:39 [ الرد ]

Send your brother a link to this post
D:

Andrei | 20/10/2008, 14:42 [ الرد ]

بصراحة.....وعلى بلاطة..
اللي بستحي من بنت عمو ما بجيب اولاد...
اذا اتصلتي مع اخوكي او هو حكى معك فهميه الوضع بطريقة لطيفة..
يعني اعطيه من الآخر...واكيد ما في خجل بين الاخوة ...
عقبال عن اولادك ام عبد الله

تحياتي

Mohammad B. Irshid | 20/10/2008, 15:27 [ الرد ]