رد السّلام
يالعوض أخوي
وصل السّلام
سلام من ناساً كرام للكرام
كلامك إت مو مثـل الكلام
مثـل كلاما بسمعه
وكتين أمش للوطن في كل عام
سماحته زي قصيصاً مفصّـل
ومنضوم في رقيبة أم رخام
وريحته ريحة طلحاً يضوّي
دخانه في قديم الحمام
وطعمه طعـم تمـرًا معطون
من جليدات بنـّوتنا ماخد لون
أنا مابقدر أوصّف كلامك بالكلام
لكن بحس بيه
في مشاعري المعاك
بي حب الوطن هامت هيام
وأصله المتيّم
مابقدر ينطق بالغرام
شوف كيف الزمن
لمّانا في نص الزّحام
وفجّينا الخلق في زمناً
تقول خشوم النّاس ملجّمة بي لجام
وبدينا الكـلام ......
وقالو أصله الطير
بقع علي أمثاله
ولدا مثـلك إت
أنا ديمه بتمناله
العيشة الهنيـّة
ويبقى مستور حاله
ويرجع لي ملاذاً
ديمه بتغـنـّاله
رجوعاً الناس يتمنو حاله وفاله
ويلاقي أولاد فريقاً
مثل الصقور في سماهم جالـو
ويبشّر فوق عرايساً
مثل الفروع
فوق عشوشهم مالو
يشوف جمال بـنـّوتاً
خدّهن ضوّاله
في كـبسَة الغربة الزمن كاوياله
ويبرّد فؤاداً
جمر الفراق ملاله
ويروَى من شرابٍ
ماألـذ ّ زلاله
يتمدد ويغازل للبدر في كماله
ويتقدّل عزيز
من جنوب لا شماله
يرسم للخطى
في طينه أوفي رماله
ويقول ليهم حديثا
يخلي أرواحنا تتشاباله.......
شيل منّي السّلام
لأهلا عدال مامالو
قوليهم والله الوطن
ماشاقنا غيرهلاله
والله الوطن
أنا في العيون شايلاله
وأنا حب الوطن
بيـن الضلوع ضامّاله
وأنا حب الوطن
بالدموع ساقـياله
مرتعه في حشاي
وفي القليب مقياله
وأنا حب الوطن
في النفوس غارساله
عزيزاً مصون
يتوارثـوه أجيـاله
وأنا أسم الوطن
بي سمح الخصال حافظاله
وأنا أسم الوطن
بالشّـرف الرفيع صايناله
حضناً ضمّ للأحباب
أنا روحي مشتاقاله
ولمليم الشمل
أنا بالسنين راجيـاله
أتجرّعت كاس الصبر
والحنظل دوام لايكاله
أتشربكت بي حبلا ً
عراض آماله
بس حلال العـقـد
قـيـدي ماحلاله
