ما أَمَرَّ اللّغةَ الآنَ وما أضيقَ بابَ الأبجديّهْ.
"أدونيس"
27 تشرين اول, 2008
بـ المشرمحي يا حكومة !..
"نفط برنت بـ 59 دولارا وترجيح قرار جديد بتخفيض المحروقات واسطوانة الغاز"
ارحمونا من هالقصص .. قال ترجيح قرار جديد بتخفيض المحروقات واسطوانة الغاز ..طب وبعدين !!
بدها تضل الشغلة هيك تخويث بتخويث ؟
يعني شو بالنسبة لباقي المواضيع "الاسعار" : شو بالنسبة لسعر العدس والالبان والاجبان والحليب والخبز والبيض واللحمة و تونا والسردين والفول والحمص والخضار والكهربا والسكر والرز وفوط الاطفال والنسوان والعلاج....... الخ ... الخ ... الخ ومش عارف شو وايش !! وكمان شو بالنسبة النا احنا ؟؟! مش هالأرتفاعات بحجة اجور الشحن والوقود الي ارتفع ، طب هي انتو شايفيين كم مرة صار نازل من بعد ما طلع حتى انو نزل اكتر مما كان اول ، ولا مش منتبهين ؟ اذا مش منتبهين موضوع تاني ! واذا في قصة تانية احنا مش فاهمينا احكولنا .. بس انتوا احكوا .. خبرونا شو الموضوع عشان ما نتهمكم بالتخويث ومش عارف ايش ، ما هو الواحد منا بني آدم وممكن يفكر بأشياء كثيرة وممكن يظن بأمور مش صح او انه يفهم غلط !
طب يا حكومة احنا عارفين انك رفعتي ايديك عن قصص الدعم وغيره ( وعلى فكرة دعم المحروقات ما بدنا اياه خوذوه لأن البترول نزل وصار بـ 59 دولار اليوم)، رفعتي ايديك وعومتي! وياسيدي على التعويم لما يكون كل شي متل الخشب ودايما طافي وعايم على الوجه .. رفعتي وعومتي وبطل الك دخل بشي .. ولا بأشي /لا بالتجار ولا بالمستوردين ولا بالتسعير والتدقيق ولا بالشعب اصلا/ خلي الشعب ينحرق الله لا يقيمه ويدبر راسه مع هالحيتان !!
مشان الله يا حكومة شوية رقابة .. أو حتى رأي .. /نسمع زغرودة من الشباب الي قاعدة ورا/، والله ما أنا عارف يعني انت مش شايفه الناس وفاهمه الي هم فيه أكيد ..أكيد شايفه والأكيد الي اكتر من هيك ان الناس كلهم خاف عقلهم ومش ملحقين ولا عاجبهم اشي وصرت تشوف الواحد فيهم متل المخبوط على راسه ، ويعني الي بتصحله فرصة ما بقصر /الي بدوا يسافر والي بدو ينصب او يسرق وممكن يبيع اعضائه واشياء تانية/والأشي الي بقهر اكثر : النواب /السادة النواب/ ، وللا يا عمي لا بدي انقهر ولا عالبالي ما هم عايشين ومبسوطين وببرطعوا.. رواتب ايش وامتيازات حريقة مرة سيارات بدون جمرك ومرة زيادة رواتب /يا حرام كانوا تحت خط الفقر/ ومرة تصاريح حج ولجان وأهم شي اسمه نائب .
شو المفروض نعمل يعني ؟ وكيف بدنا ندبر حالنا ؟ ما هو لازم حدى يدبرنا بشي حل ! ، لأنه هيك ما بنفع! لازم شي وزارة او هيئة معينة تتصرف وإذا هاد الحكي مش من صلاحيات حدا : يشكلولنا هيئة جديدة عشان هالموضوع .. مش صعب ولا سابقة عنا هيئات خير الله ،وشو يعني لو زادت كمان هيئة وخصوصا اذا كانت هيئة فعالة .
بدنا هيئة فعالة ترحمنا وترئف بحالتنا وتجبر بخاطرنا بأي اشي .. هم مش ملاحظين انو احنا بنحزن ومكسور خاطرنا دايما .
خالد السعود
تعليقات
واضح انك بتعاني من الفوط اكثر من اي شي تاني بس يا اخي احنا وضعنا مرتاح يعني على سبيل المثال تنكة البنزين كانت ب 3نانير صارت ب5 نطت لل8 وهب 14 دينار نزلت لل13 وشوي ومن ثم الى 12 وفكة مع انه اذا جيت تحسبها على السعر العالمي ما بتتجاوز ال6 دنانير وخلي الحكومة تعوم يا اخي همه بعومو على الوجه واحنا بنعوم بالقاع
بس موضوع الفوط بعنيلك كثير هيك انا شاعر ؟؟؟؟
انا
| 27/10/2008, 15:40
مش كتير كتير ..
بس انا شايف الي لفت نظرك هو موضوع الفوط !!
خالد السعود
| 27/10/2008, 15:44
لانه بصراحة بعاني منة بشكل كبير
انا
| 27/10/2008, 15:47
يسلم لسانك يا معمر القذافي لما حكيت ( اول مرة بشوف دولة قائمة على كتاف الشعب )
انا
| 27/10/2008, 15:46
(معك حق ياسيد خالد بكل حرف حكيته وانا كتير كتير معجبه بشخصيتك واسلوبك بالكتابه انت عنجد انسان مبدع...بتمنالك التوفيق دايما )
(قمر)
| 27/10/2008, 15:54
والله يا سيد خالد كلامك ممتاز بس موضوع الفوط ماخد حيز كبير من موضوعك روح شوف صاحب مصنع من مصانع الفوط وتعاقد معاه وان شاء الله بتنحل مشكلتك
رجل شجاع
| 27/10/2008, 16:20
لو كانت شجاعتك اكبر من هيك بحق "فوطة " كان كنت أول واحد بيروح تحت الطاحونة الشيوعية على شكل فوط لأولاد القادة الرفاق..
انت ضد البلد وضد الشعب
و ما عندك انتماء حتى لاولادك و فوطهم!!
الرفيق خالد ما حكى غير الصدق و الصواب و الصحيح
بس العتب عاى اللي ما بيفهم غير "الفوط"
الرفيق غسان
| 01/11/2008, 22:37
و الله يا معلم مافي رقابة فيها رقيب زي العالم و الناس في هالبلد... بس احنا لازم نعزرهم عشان كل واحد منهم يا دوب مراقب جيبته و حسابه البنكي كييف يكبر او ويين في ضربة(نصبة) جديدة, والله يا معلم كل كلمة قلتها صحيحة 100% و يا ريت حدا يصحى و يحس فينا..... و صدق من قال الاردن مقبرة للشباب و لكن للاسف صارت مقبرة لكل الفئات العمرية..
ابو عامر
| 27/10/2008, 19:57
هو لو كل هالاشياء الغاليه نظيفه وما بتسممش ومش مليانه اشعاعات وحشرات وفيران ماشي...عوموها....بس تعوموها والامراض تعوم على بدنا لأ كتير هيك
whisper
| 27/10/2008, 20:15
الملف الشخصي
- الاسم: خالد السعود
القائمة
بحث
حديثا...
استطلاع الرأي
الروابط
التصنيفات
Syndicate
A service provided by Al Bawaba
اول شي بقدر اقول مرحبا...
كل الكلام الي حكيته ممتاز ومقبول بس في شغلة وحدة مش عارفها ممكن انه الحكومة مش حاسة فيك ولا فيا ولا في حدا من الشعب لانهم مش عايشين معنا ولا حاسين باي شي بصير عنا كل همهم كيف يجمعو الفلوس من اي مكان كانت حتى لو من لحم الشعب ودمهم ومش حاسين انه الشعب كله او بلاش كله 60% منه بفكر يطلع برة البلد عشان يعيش او على امل انه يحس كيف الناس بتعيش لانه احنا في الاردن ما حدا عايش كلنا بنصحى من النوم بنفكر كيف بدنا نسد ديونا كيف بدنا ندبر فلوس عشان نطلع على الشغل كيف بدنا نطعمي ولادنا كيف وكيف وكيف حتى الواحد يصير زي المخبوط على راسه واذا واحد حكالو السلام عليكم برد عليه وانت بخير.... بس المهم هسا اذا في حدا بطلع على هاي المدونة او بحاول يشوفها من المسؤولين انه يحاول يفكر فيها شوي مش اكتر ويحس مع هالعالم الي مش لاقي يوكل او بسافر على اخر الدنيا ما بشوف ولاده ولا اعز الناس على قلبه عشان بس يقدر يعيش ويبعت فلوس للوراه عشان يعيشو بس يفكرو شوي وجد يرحمونا عشان نعيش زي باقي الناس
ياسر بطاح
ومش حاب احكي اكتر من هيك لانه عارف انه مش راح حدا يشوفه ولو حدا شافه راح يلغي الموضوع كله وما يرجع يشوف اي شي