القلب الجريح | العفريت

العفريت

24 تموز, 2007

وانا ماشى فى حتة ضالمة وعاتمة ... والدنيا حواليا ساكتة ... فجأة طلعت لى قطة سودة خضتنى ولبشت لى الجتة .. قمت اتكعبلت فى حاجة ناشفة .. قلت ده يمكن حجر ولا يمكن عينى مش شايفة .. قمت من التراب وبصيت لقيت صندوق كبير .. شكله عجيب وغريب ... قمت فاتح الصندوق ولقيت فيه كنز مهول ..!!! اشى ياقوت على لولى على زمرد ... احمدك يا رب .. ومرجان كمان وجواهر لا حصر ليها ولا اخر ... وبصيت لقيت معاهم مصباح علاء الدين ... قمت بسرعة ماسك فيه ومكلبش ودعكته علشان اصحى العفريت الفقرى اللى نايم جواه ... قام رد على العفريت من جوه المصباح .. مين اللى بيقلق راحتى وبيزغزغنى ... قلت له .. لمؤاخذة يا سيادة العفريت .. معلش .. انا عايزك فى كلمتين لو سمحت على جنب شوية .. قام رد على العفريت وقال .. عايز ايه دلوقت فوت على (تومورو) يعنى بكرة وعلى فكرة انا عايز اخد (سليب) دلوقت يعنى تعسيلة ... قلت له .. لا والنبى اعمل معروف انا محتاجلك دلوقت .. اصحى فوق اظهر وبان عليك الامان ... ظهر العفريت الفقرى والدخان مالى المكان ولقيته مولع جوزة وبيكرس وبيشد الانفاس وقال .. شبيك لبيك يابن الناس .. تطلب ايه شاى ولا سحلب ولا اناناس .. قلت فى نفسى .. ايه العفريت ده اللى طالع من غرزة ...فقلت له .. ايوه انا عايز حاجات كتيرة قوى .. انا عايز اموال وقصور وخدم وحشم وجوارى يعنى مزز .. قام اتهبل العفريت وطلع لى لسانه وقال .. يا اهبل يا عبيط يبقى الكنز الحقيقى قدام عنيك وتحت رجليك وتصدق ان لسه فيه عفاريت بتطلع فى القرن الواحد والعشرين .... وصحيت من النوم !!!!!!!!!!!!!!!!!!!!!!!!!!!!!