انشىء مدونتك الخاصة | تسجيل الدخول
المدونة التالية

مدونة حليمة محمد عبدالرحمن

انا صحفية سودانية. أحاول في كل منحي أن أجد لنفسي متلمسَا
صوتي المبحوح ولو همسَا

« | »

12 كانون اول, 2007

إلزامية الطبيخ وأشياء أخرى

إن من أكثر الأشياء سوءاً عند أخواتنا (إياهن) اي النساء العاملات،  الخروج في الصباح الباكر قبل المرور على فريزر الثلاجة لإخراج طبيخ آخر النهار.. أو حمل ذلك "الهم اليومي" إلى الجهة المقصودة (إياها).. أما إذا كانت الجهة المقصودة لا يتوفر بها أو بالقرب منها أي بقاله أو مطعم لبيع الدجاج والأرز، لفك الزنقة.. تبقي دي مشكلة المشاكل.

بعيداً عن هموم الصحافة بمتابعة احدث المستجدات على الساحة المحلية أو الإقليمية أو الدولية، هناك الهم الأول للصحفيات ربات البيوت..
يا ربي الليلة نغديكم شنو؟
يا ربي الليلة تعشيكم شنو
يا ربي الليلة ما تاكلو سندوتشات في الغدا وتريحونا
يا ر بي الأكل دا كان خلوهو الزامي كبسولات بس ما كان احسن؟
يا ربي اناح اجن تاكلو يا شفع النهار ما طال.. وبرضو جيعانين..!!
يا ربي انا اسوي شنو في الافواه المفتوحة دي طوالى.. دايرة تلوك..
يا ربي.....انا ست بيت؟
يا ربي....موظفة؟
ياربي...مثقفة؟
ياتو من دا؟
ولا دا من ياتو؟
واحد؟ ولا ولا واحد؟
انا الوداني ذاتو اعرس شنو؟
يا داب بقيتي تسألى؟
تبدأ الشكوى بالطبيخ وتنتهي بالشعور بالظلم..
لست الشاكية في الجملة الأخيرة...
لكنني لا ابعد عنها كثير
على الأقل شكواها تستهويني..
يا ربي الوداها تتناطا وتقول دايرة تعرس شنو مادام متعلقة بشغلها كدا..؟
ـــــــــــــــــــــــــــــــــــــــــــ
يا اخوانا الزلزال ضرب باكستان؟
وفي انفجارات في لندن؟
وتاتشر في المستشفي.. النجهز لينا مادة عنها..!
والرئيس الفلاني قرب يموت، مؤكد قرب؟ طيب راجين شنو ما نجهز النعي من هسع..!
في اليوم التالي...
يا اخوانا الراجل دا لسع مامات؟
لا والله.. "سوري ليكي"
لا حول.. مستني شنو؟
مستني يومو..!!
طيب دا ما بيخ لينا النعي...
النعي موش قاعد .. ما "تركبيهو " في الصحيفة في الوقت المناسب..
بس كتار ح يكونوا شاركوني الفكرة وجهزوا نعي كارب..
وفاتني السبق..
يا أخوانا تطير عيشتكم حتى في الموت بتدورو تتسابقوا..
الشيئ شنو؟
الشيئ ما ياها اكل العيش..
اول السبق دا بجي عُقُب الحادث؟
بت بخيتة ماتت..
لا حول...
مالكم ؟
بت بخيتة ماتت..
يا ود اسكت,,وطي صوت الرادي
قلت شنو؟
بت بخيتة ماتت..
طيب الوداها شنو؟
وداها وين؟
هَيْ يازولة اتي ماك نصيحة ولا شنو؟
قلنا بت بخيتة بت ام حسين الحبوبتها الطرشاء بت عتمان ماتت..فهمتي..ولا نكتبها ونعلقها ليك جنب شاشة التلفزيون..
لا حولااااااااااااااااا... ماتت بتين؟
امس..
دي موش عرسوها الشهر الفات.؟
ما ضاقتو ولا قطعو رحطها..
طيب الكتلها شنو؟ ما الولادة؟
اها جابتو ليكُن شئ آخر..
عرسوها الشهر الفات في رأيك ..كتلتها الولادة هسع؟
انتي بتجمعي متين؟
سؤال وجيه..

بواسطة halimam 07:22 | خواطر | تعليق(3) | الرابط الثابت

تعليقات

Comment Icon

شكراً لك

Arrow Icon خلفيات | 13/06/2008, 20:30 [الرد]

Comment Icon

شكراً لك

Arrow Icon انيمي | 13/06/2008, 20:31 [الرد]

Comment Icon

يعطيك العافية

Arrow Icon انمي | 13/06/2008, 20:32 [الرد]

اضافة تعليق
authimage
رمز التأكيد
 
A service provided by Al Bawaba