حالى واحوالى
ghopary | 26 ايار, 2008 22:07
هتكلم عن حالى واحوالى
من زمان فاكر ياحالى اما كنت صغير وعمر الحزن ما كان جالى , كنت العب واجرى وضحكتى دايما بصوت عالى ، عارف لية ياحالى لان الامور دايما كلها سهلة ومفيش مشاكل ولاهموم تيجى على بالى ، الحب كان فى كل مكان وحتى لو فى يوم نسيتة كان ينادى لى ، واما كبرت شوية سنين عددهم مش كتير لكن نقول فى العشرين ، ونادوا على وقالوا لى انت بقيت عفى وبلغت ولازم كل شىء تعملة يكون رجالى فى رجالى ، ولقيت شوية قطن قالوا لى دة هو الشنب ما انت بقيت رجال ولازم تبعد عن لعب العيال وتتحمل شوية مسئولية لاجل تكون مثل يحتذى بية الاجيال ، ولقيت نفسك ياحالى حسيت بصدمة والم وقلت لى وانا كان مالى ومال المسئولية ولا هو حكم اطلقة على الزمن ولازم انفذة والا ما فى الا ضربة قلم تسبب لى الم وندم ، فاكر ياحالى لما جرت بنا الايام واصبحنا شباب ناضج لايهدة اى انسان والسهر بقى دمى وكان النوم بعيد عنى وكنت فرحان بحالى والمستقبل شايفة ابالى ، ودخلت الجامعة وهى لكل شىء جامعة ، فغيرت حالى وحالى اللى كان زمان حالى بقى غير كل حال من زمن حالى ، وبحكم مكان الدراسة بقيت بعيد عن اسرتى قال اية فى الدراسة ، ومن كلية الى كلية وانتهى حالى فى كلية عمرها ما جت على بالى ، وجرت بنا عجلة سلطان الزمان ، لا والله ما انى ندمان بس بتذكر حالى ايام مرت بنا ، وكان نفسنا نحقق حلمنا لكن القدر واللى بنرمى علية كل اسباب فشل حلمنا ، خط لنا جديد طريق ايوة مش طريق جديد والفرق لازم يكون واضح لاننا فى كل طريق ما كان بخاطر مننا ولا بخطة و تخطيط لكن هى دى القسمة والنصيب واللى مكتوب لنا ، وكان لازم نرتبط لاجل يكون لنا اسرة ، وبدء التعب والاعتماد على النفس فى رحلة تكوين الاسرة كان فيها فترات جميلة ورغم صعوبة صنعها الا اننا كنا بثقة عارفين طرقنا والدنيا فردة لنا جناحها ولا حد يرضى جراحها ولا يهز شعرة من ريشة بترسم بيها طريق كفاحنا ، كان كل يوم بيمر بينا كانة الف يوم عاش فينا صراعات امم ومناظر تبكى الحجر اطفال بتموت امام عنينا وبلاد بتحتل من حوالينا ومجاعة وتشرد وعقاب زمن لا لينا فية اى قدرة ولاعمل ، فاكر ياحالى ما هو دة اللى بكانى حالى ، صراع فى كل مكان وموت بيحصد بشر وجوع بيعمى قلوب الناس وبيفقدهم كل الاحساس وكأن مكتوب علينا نأسى وما فى احد عم يواسى ، فاكر ياحالى لو كنت بقيت على حالى منذ الصغر ، ولا كنت موت وما شفت اللى امام عينى ، مش دة كان احسن ياحالى بدل ما اشوف اخوات بيقتلوا بعضهم ولا ابناء عمومة بيتشفوا فى نفسهم ، ممكن ياحالى اسألك سؤال جة على بالى ، ممكن نعود ونرجع ال كام سنة ولا ندخل بيات طول العام مانشوف يهود ولا العم سام ، ابكيك يازمن ولا تبكينا الايام ما احنا لابنهدى ولا ننام ، والا اقول لك خلينا ذكرى وكل ذكرى دايما بتعيش فى الاحلام حتى لو كانت اوهام انسان ، وحالى هو حال كل الناس لابنهدى ولا نرتاح اصلى انا سواح بدور ادور على اى صح فى كل مساء وصباح ، ما انا واحد من بين هدول الناس .
