ليه؟؟

محمد عثمان جبريل

عدسةإبراهيم التميمي

: لما امد إيديا ليكو

أشتريكو

ليه فى أول سوق تبيعو

...

ليه عشان حطام وزايل

ترخصوا أو تضيعوا ..

ليه ...

يا صحبة الطريق

ليه تخونوا

وانتو أول الخساره

ليه و قلبى ليكو جامع

ليه وصدرى لبيتكو حاره

ليه ...

هو عيبى إنى عاشق

هو نقصى إنى كامل ؟

فى زمان ناقص و خامل...!

**************

: يا عبيط

لو تجامل ..

أو تحايل .. إيه يضرك يا عبيط ..

إيه هاينقص من رصيدك ..

مد إيدك

و اشترى شوالين نفاق

أخبز دقيقهم كحكتين

للاتفاق

يفرحوا

و يقولوا فاق ...

ويرجعوا حوليك يغنوا

و يعملوا فى الزفه عيدك

يا عبيط

فى زمن التأمرك و الهوى

لا ينفع دوا

ولا يجوز الاحتشام ...

أمسح بوشك الحيطان

شيل عالكتاف

سربين حمام!

و غصنين سلام ...

وادهن ملامحك بالكلام

و قول وانت واقف عالهوا

أنا نصير العولمه ..

و الدولاره

و المسخره ...

والانقسام

هتلقى الجنان و الرضا ..

واقفين على بابك كدا:

تعظيم سلام ..

يا عبيط

وف ساعتها

أوعا تسأل تانى " ليه"

2005