من فوق

بشار الأسد

morahman — Mon, 02 Jan 2012 14:48:47 +0000

هو فيه كده ابداً؟

زي ما يكون بشار الأسد إشتري سوريا باللي فيها و نازل دبح

بينام إزاي بالليل ده؟

دا الواحد ممنا لو قال كلمة لحد و زعل مبيعرفش ينام

بس علي مين.....ياما مجرمين نهايتهم بقت سودة

نفسي اشوف السوريين هيعملوا فيه ايه بعد ما يمسكوه

الله..... بحبك يا مصر

morahman — Sat, 19 Feb 2011 11:31:30 +0000

أغاني لمصر أم الدنيا و لينا كلنا

وردة

دليدا

ريهام عبد الحكيم - عمر خيرت

شادية

شكرا تونس......شكرا بوعزيزي

morahman — Sat, 19 Feb 2011 11:23:49 +0000

من قلبي بقول للتوانسة شكرا جزيلا يا رجالة.....رجالة بجد و بحق و حقيق

لازم اعترف إن لولاكو مكانتش مصر ثارت علي الفساد و الظلم

ربنا يرحم محمد بوعزيزي لإنه هو اللي أشعل شرارة الكرامة و الرجولة

اللهم خذ بحقه و حق كل مظلوم يا رب

سقط حسني مبارك.....بس لسه نظامه مشقطش

morahman — Sat, 19 Feb 2011 11:20:38 +0000

من يوم 11 فبراير تاريخ تنحي الرئيس السابق حسني مبارك و حتي اليوم.....انا لسه مش مصدق

الحمد لله

لازم ناخد بالنا....مبارك سقط....بس نظامه لسه موجود مسقطش

ربنا معانا إن شاء الله

.......

من المرات القليلة إلي الواحد فرح فيها انه مصري

حرب القرود علي بني آدم

morahman — Mon, 26 Apr 2010 16:25:09 +0000

سبحان الله

السي إن إن بتقول إن القرود بتحارب الإنسان دلوقتي في جنوب أفريقيا في "كيب بينينسيلا" !!

بيقولوا علشان هناك بيشيلوا الغابات موطن القرود و بيبنوا مكانها مساكن و مصانع......هي ناقصة.....بيقولو القرود بتقوم بحملات هجومية علي بني آدم و بتجردهم من فلوسهم و أحيانا من ملابسهم كمان....ههههه

مش كفاية الحرب اللي دايرة في كل حتة بين الإنسان و الإنسان......بقي فيه كمان حرب القرود علي الإنسان....

ده الإنسان بقي حاله يصعب عالكافر.....ناقص كمان الصرصار و تبقي كملت.....فاضل كام يوم ...سي إن إن : "حاليا في القاهرة حرب الصرارير علي بني آدم و شكل الصراصير هتكسب"

الهجمة الشرسة من الجزائريين

morahman — Fri, 27 Nov 2009 09:11:17 +0000

ليه؟

مكونتش عارف لحاد ما قريت اللي في اللينك ديه....

و شفت اللي قاله الشعراوي رحمه الله عن التعصب الشديد حتي علي بعثة الأزهر الشريف.....

وا اسفاااااااه

http://www.youtube.com/watch?v=PtXisxtgit8

قريت و حاولت اربط المواضيع ببعض.......حاجة تحزن

http://msnmaghreb.yallakora.com/arabic/UserArticle/userDetails.aspx?id=24073&type=1&region=6

فيلم (the god father) مدبلج بالعربي

morahman — Fri, 13 Nov 2009 10:20:56 +0000

بجد الفيلم بقي كوميدي

مينفعش أصلا الفيلم ده يبقي مدبلج.......

أنا حاسس انه باظ فعلا....لأ و مش بس بالعربي.....لأ ده بالسوري كمان

ايه ده.....ليه كده......أول ما سمعت "منشان هيك" قفلت التلفزيون علي طول

مش كفاية انهم بوظوا كام مسلسل تركي.....دلوقتي بقت اللأفلام كمان....لأ و مش أي افلام ده فيلم مينفعش يتدبلج

أنا بقول كفاية عليهم مسلسلات نور و مهند وشيرويت و معرفش مين.....

علي رأي مشجعي الكورة "كفاية........حرام"

غريبة أوي

morahman — Mon, 09 Nov 2009 18:17:41 +0000

عندي اتنين صحابي شغالين في أمريكا

هما اللأتنين بيشتغلوا شغلانات محترمة جدا و في نفس مجال دراستهم و شغلهم و شهادتهم....و مرتباتهم كويسة أوي و كله تمام

بقالهم يمكن خمس سنين .... كل واحد فيهم في ولاية مختلفة

واحد منهم خلاص راجع كمان أسبوعين انشاء الله و التاني نفسه يرجع......حاجة عجيبة

هما اللأتنين ورق الفيزا مظبوط و كانوا بينزلوا كل سنة مصر أجازة

نفسي أفهم حاجة واحدة: هي العيال دي اتهبلت في مخها ؟؟

حقيقي.......يدي الحلق للي معندوش مخ.....هههههه

شادية

morahman — Sun, 08 Nov 2009 19:25:26 +0000

ست هانم حقيقي

بجد كل لما اسمع صوت شادية بحس ان اللي بيغنوا دلوقتي - ستات و رجالة - بتوع روبابيكيا....طبعا ماعدا شوية ناس قليلة كويسة

ليها كده كام أغنية تحفة....و بالنسبة لي أحلاهم ..... مش عارف..... كلهم حلوين بصراحة

و علي السيرة لينك كده تحفة:

http://www.youtube.com/watch?v=VPBe4d2PvXE

شكرا شادية.....وحشتينا

رحلة ابن فطومة

morahman — Sat, 07 Nov 2009 15:34:47 +0000

كنت قريت زمان رواية لنجيب محفوظ اسمها "رحلة ابن فطومة" و ساعتها عجبتني جدا

و طبعا كالعادة الكتاب ضاع مني......بس اشتريته تاني....و خلصت الرواية النهاردة

بجد نجيب محفوظ عظيم فعلا......ليه كمان رواية "حكايات ألف ليلة"......مقدرتش اسيبها الا لما خاصتها....و كمان قريتها مرتين.....بس ده السنة اللي فاتت

دلوقتي بقراله "حكايات حارتنا" و دي جميلة جدا

الله يرحمه و يبعتلنا واحد كمان زيه