.

وجـيـه الـتـعـاسـة

حزين .. واضحك في وجيه التعاسه

عايش .. على فل الحجاج .. ومرفـّه

دمعي تناثر ... مزنته ... بالدساسه

وادعي .. ولاني في حظوظي مسفـّه

لو زار همّي .. اشعره ... بالتماسه

يا دفـّني ... للموت ... ولاّ ادفـّه

عموماً .. احزاني .. تعرف النجاسه

وتعكّر .. اوقات الهوى .. المستعفـّه

من عام الأوّل ... صابني .. التباسه

ذكي ... ولكن يحسبوني ... مخفـّه

للناس حكي .. وللعواذل ... خساسه

وللرد .. أشعاري ... وللوجه ضفـّه

خلهم .. على تفكيرهم .. في عماسه

وخلني ... على تفكيرهم ... آتأفـّه

ما همّني .. وانا اعيش ... بسلاسه

اعبر .. من كهوف الهقاوي .. بخفـّه

وان صادفتني .. في طريقي .. نحاسه

القى بدرب النحس ... عشرين لفـّه

كذا من الله .. امسهلٍ لي .. لباسه

ثوب البخت .. ما يشبه لثوب دفـّه

عندي باساليب الصراحة ... سياسه

وعندي حبيبٍ .. صورتي فوق رفـّه

من يوم ما لبّست ... بيديه ... ماسه

حسّيت كنـّي شايله ... وسط زفـّه

قرّبت .. ناسي للرحم ... حول ناسه

ورسمت للبسمات ... مليون شفـّه

وزيّنت له بالقلب .. بيت .. وحراسه

وصارت ضلوعي .. في يدينه مهفـّه

وغيّرت .. في ميزان عشقي وقياسه

يكفي .. لميزان المعاشيق .. كفـّه

هذا ... وانا مشهود لي ... بالفراسه

لقيت نفسي واقف براس .. حفـّه

مبايعينه ... يستلم بي ... الرئاسه

عروق جسمي .. يوم تاقف بصفـّه

جفّ البحر من مشيته ... في خلاسه

وشلون عيني ... عاجزه ما تجفـّه

يا كود باسي .. ماخذ اليوم ... باسه

والشوق فيني .. يا عسى يتستشفـّه

مشتاق له .. من راسه .. ايلين ساسه

يا ليت .. في منـّه حبوب .. واسفـّه

واستطعمه .. ثم استطير .. بشراسه

من لذّته ... ماظن روحي .. تكفـّه

في وجهه نور .. ومن كثر .. احتباسه

كنـّه يقول : النور .. حولك مطفـّه ؟

ورموشه ... فيها من الثقل والنعاسه

تعجز ... هبوب المغربيّة ... تهفـّه

طاهر ... واذا ودّي اشوف انعكاسه

عفـّه ... تقابلها من الخلف .. عفـّه

راعي وفا .. ولا الوفا .. هو اساسه

يا قلب لا تخونه .. ويا شعر .. وفـّه

ويا صاحبي من قبل .. وقت الدراسه

اللي سمعته .. طنـّشه .. ثم .. قفـّه

شاعرك .. لا هذرا عليك .. بحماسه

حطـّه على صدرك .. وضمّه .. وغفـّه

حـزّت بـنـفـسـي

قصيدة من القديم ..

كما هي!

قصّتها .. في دولة عربية ..

إمام الجمعة لا يخطب سوى في عذاب جهنّم ..

بخلاف الجنّة والحور العين .. والتذكير بنعيم الآخرة!

دمعات .. وآهات وبنات وجات باوقات الفوات
           هقوات وفزعات ورفات .. وكلّه منشان الخوي
تْعيش مع أهلك .. ولكن ... ما تعرف ان الحياة!
           تبغى البنادم .. يمشي في دربٍ على شكلٍ سوي
غض البصر صوم الشهر .. واعرف عذاب الله آت
           الشيخ دايم يخطب إلنا ... في عذاب الله القوي
ليه يا جهنّم ... نذكرك دايم .. في أوقات الصلاة
           حنّا ... نعرف انها لكفّارٍ ... بتشويهم .. شوي
لان البشاير .. ماهي مثل القمع .. في دنيا سبات
           ولان الحروب اليوم .. صار لها مثل صوت العوي
ياخي .. اذكر إلنا وش حياة الناس من بعد الممات
           ناسٍ تصلي ومؤمنة .. من بير زمزم ... ترتوي
المشكلة .. ما هي نفوسٍ ... في معاصي مذنبات
           المشكلة .. بعض الشيوخ اليوم .. صاير تربوي
افعل كذا .. اترك كذا ... كن الحقيقة في شتات
           وكن اللي في مسجد أمامه .. في صفوف الثانوي
والله .. يمكن هالبزر .. يفهم .. على قد الفرات
           حتّى علومه في الشريعة ... مع شيوخٍ تستوي
حزّت بنفسي .. يا عرب , ونفوسكم متجمّعات
           في مسجدٍ فيه الخطب تاتي على شكل الدوي!

عـشـت يـا راسـي

عشت يا راسي .. على ما قيل راسي
          مــ تزعزع .. لو تزايد بك .. هجوسك
كل ما جيت انكسر .. يشتدّ , باسي
          من غرابيل .. الزمان .. اللي تحوسك
والدموع ... اليا جعلت جفني مراسي
          جزرها .. بسمه , تداعب في عبوسك
ما يخالف .. وين انا .. بين الكراسي
          المهم .. متوني .. تناسب .. جلوسك
احترم .. فيك التغاضي ... والتناسي
          واعتصار آلامك , بعضّة .. ضروسك
واعتبار الحزن .. في الدنيا .. أساسي
          تجعل همومك , قبل تحكي ( تبوسك )
والوصايا .. والقناعات ... الرواسي
          ابعدت نظرة عيونك , عن عكوسك
يوووووه يا راسي .. كبير بوقت قاسي
          والله صارت هالقساوة من طقوسك!
بس تصدّق .. من كثيرات , المآسي
          استفادوا .. الجوارح .. من دروسك
عشت يا راسي , ولو منت متواسي
          بس يخسى راس .. لو فكّر يدوسك!

يـا وجـهـي الـسـمـح

يا وجهي السمح .. خل البسمه , العذبه
          كيد البشر .... لا يهمّونك .... فعايلهم
كم راي , مابيه .. عاند راي .. آخذبه
          امشي .. بكيفي .. رغم آراء .. شايلهم
اهدّي الفكر ... عن شهوات .. وآهذبه
          واقصر يديني .. ولو ان كنت .. طايلهم
كاتب على الصدر .. جملة , كنّي اشحذ به
           يالله ... تعوّض خفوقي .. في مثايلهم
ناسٍ لهم ... كانت الاشواق .. منجذبه
          والحين .. في الوصل ... ما توفي مكايلهم
غرقان في بحرهم ... ما شفت منقذ به
          بعكس , احباب .. تغرقني .. جمايلهم
جرّوا رفيقي ... على أمرٍ ... ينفّذ به
          وياما كفتني ... طبايعهم ... هوايلهم
واثره على جرحي الدامي ... تلذّذ به
          والمتعة في الجرح ... يستخفي دلايلهم
حلف بقولة حشا ... ما يقصد يعذبه
          وانا بقولة حشا ... يعمل ... عمايلهم
مسكين .. أصدّق كلامه حتّى لو كذبه
          صحيح اصدّق .. لانّه هوّه ... قايلهم

الـعـرش

العذرا ... اللي في فؤادي ... آنست
        لحظة سعادة ... دشّت ... بتدشيشته
في داخل الصدر .. المعنّى ... أسّست
        مستقبل ... اللي باقيٍ ... من عيشته
كل العذارى .. في زمنها .. وسوست
        ويحاولون .... بهـالزمن ... تطفيشته
ما هزّت .. الريح .. الجبال ونسنست
        والطير .. ما يحسب .. سقوط لريشته
من فوق .. عرش العاشقين اتنومست
        هم رشحّوها ... تستحق .. تعريشته
في عينها ... كل المعاني ... إدسّست
        وفي رمشها .. كل الدلع ... ترميشته
حبّات سكّر .. في الشفاة , تكدّست
        طاشت ولا ادري وش سبايب طيشته؟
ريح الخزامى ... منّها ... لا تنفّست
        تطلع وتدخل .. ما احسبت تخشيشته
علّمتها .. كيف المحبة؟ ... ومارست
        الغش .. واحلى الغش .. في تغشيشته
أتمادى .. في وصفي ... لها واتحمّست
        درويش يفرح ... لا افرحت درويشته
إمحوّشٍ .. بعض القصايد ... لا نست
        هيّه .. سبب شعري .. وهي تحويشته

مـا يـسـتـحـي الـهـم؟

ما يستحي الهم؟ .. من طاريه بأشعاري؟
          ما يخجل الحزن ... في القيفان ... بالمرّه؟
متى؟ .. يوقّف .. زماني البايع .. الشاري
          واصير ... منقول .. من سوقه .. إلى بِرّه
واموت ... واطفى من الذكرى بانواري
          وتبقى لي شمعه ... فلا تحرّه .. ولا تضرّه
مستصغر المتعة .. وابني فوقها .. جداري
          واقول ... لتهامة .. ويّا طويقها .. حَرّه
كنت احسب الفرحة تفضح ثوبها العاري
          واثاري وجهي ... على البسمات يتشرّه
يا صايد الروح .. وانته مسوّي مو داري
          ياللي تبرّر .... بان النفس .... مضطرّه
ياللي جوارك نعيمي .. وغيبتك .. ناري
          ياللي عجزته ... أميّز ... خيره من شرّه
ياخي تلطّف ... علامك قلي شالطاري
          لا ترخص عيون .. تدمع لك .. ومحمرّه
اوّاه .. يا حالي .. لا شاكي ولا مداري
          لو كان حبّك .. على مثقال .. من ذرّه
صمتي يوضّح لك .. اخطائك واعذاري
          ونبرات صوتك .. تعاني ... روح مغترّه
وقتي وقضّيته .. باخبارك ... وباسراري
          وعمري ... لو الله ... يخيّر عبده لاكرّه
وتصير منته .. قريبٍ لي ... ولا جواري
          ولا تدوج .. بمحاني .. نفس .. مخضرّه
يذكرني الشعر .. وانته عيش , بانكاري
          لو كان للذل .. عينٍ .. فانته ... القرّه!

جـانـي بـعـد غـيـبة

جاني .. بعد غيبة وفي خاطري بوح

عل الضمير .. اللي نساني .. ملكـني

جاني ... وزاد الحزن والدمع والنوح

كـنّه .. يجدّد .. بالغرابيل .. ركـني

قال شبقى بك؟ قلت: ما غيرها روح

وروّح على عادة جواب .. وتركـني!!

عـمـي سـلـيـمـان الـخـطـيـب

حيّ الذي في شوفته .. يسرق العين
          كن النواظر .. حالفه ... تحت طوعه
جيته .. وانا اقبّل جبينه .. واليْدين
          واطلبه ... يطفي , لغيابي .. شموعه
عذري مشاغل دنيتي , والله لا يهين
          لا حاس , ولد اخوك , في حبّ كوعه
يا عمّي .. بسم الله وابلعن شياطين
          تبعد .. حبيبٍ عن حبيبٍ .. يجوعه
يا شيخنا .. يا فوق , كل القوانين
          يا مشابهٍ .. بدر السما , في طلوعه
يا ماخذٍ حقّه .. من الحب ضعفين
          ياللي لك .. آذان , الجماعه سموعه
والله .. كنّك في المرض واقفٍ بين
          قلبي وشرايينه ... وصدري وضلوعه
لا عاد تنشد .. الدكاتر من الحين
          عسى الطبيب .. يشوف بقعا تصوعه
بسمتك يا عمّي .. غدت كنّها دين
          وضحكتك خلّت .. كل نفسٍ قنوعه
هيّه كذا روحي .. شفوقه لغالين
          والله ياخذها .. اذا هي .. قطوعه
عمّي .. وربّي ما خلق غيره اثنين
          حتّى ولو تستنسخه ... نفس نوعه
دايم اقول انّه .. يساوي كثيرين
          وياما اسولف للعرب .. عن طبوعه
لا تحسبونه طاح .. انتم مجانين؟
          ما ينثني ... الاّ بسجوده وركوعه
الله يطوّل عمر عمّي .. ويا زين
          مسك الخطيب اللي غدينا فروعه

مـلاوعـه

لا جعت حبّه .. وانقطع بوصالتي
          أبكي علي قلبٍ .. يحب يجاوعه
صعبي .. يحدّد .. متجّه سهالتي
          تثبت له اشواقي .. وهي متناوعه
يا صاحبي .. يا ليت تنظر حالتي
          ولاّ على قول العراقي ... باوعه
خلّيت روحي .. تحتري لشيّالتي
          كنها على موت الهوى متطاوعه
وحوّلتني لبنك الشقا .. وحوالتي
          مكتوب توقيعك عليها ملاوعه!
لا يا بعد خالي .. وفدوة خالتي
          وطيوفك بوقت المسا متكاوعه
نظرة هلك .. لا ثمّنوا .. ازالتي
          نظرة يهود الكون .. للمطاوعه

عـلـى هـذا الـنـحـو

فؤادي صار متفهّم .. لاي موجة زعل
          لانه .. ياخذ الخبرة .. من اللي .. جرّحَو
وانا مع أمنية .. ضايع .. ويا ليت ويعل
          عسى .. ما ينكسر خاطر .. ولاهم يفرحو
أحاول قد ما اقدر .. بضحكٍ .. مفتعل
          أبيّن فرحتي ... وانا ... همومي شبّحو
ولي دمعات , ما تطفي فؤادي لا اشتعل
          ولي عينين .. ما ترمش .. ويا ما طيّحو
ولي رايٍ على الرجّال .. من قول وفعل
          ولي لابة .. وأصحابٍ .. ولكن روّحو
ولي أحباب ما تدري بصدري لا سعل
          حبايب لو يناموا في خفوقي .. ما صحو
ولي ساقٍ أمشّيها .. على دروب الوعل
          ورجليني ... على درب الرخامة استحو
حياوي .. في كلامي أو بأفعالي .. لعل
          سحا .. يبدا بليل .. وينتهي لو اصبحو
وأعرْف الله .. على كثر الخلايق ما جعل
          سواي .. اللي بإعرابه .. عجز فيه النحو
عزوبي في شعوري بس .. في الواقع بعل
          لهمّي وحزني .. والاشيا على هذا النحو