مدونة شخصية : عواطف ادريس

أولا هابي ويك أند لناس الدول العربية والإسلامية ويوم سعيد زاخر بالإنجازات يا ناس دول العالم

المتقدم والمتأخر والعلاقة بين الإتنين إنهم بيصحو وينومو بتوقيت جرينتش ...

يا أخوانا يا المقبلين على الزواج أنصحكم نصحيحة خالصة لوجهه تعالى عشان الواحد فيكم بعدين ما

يندم ويقول سامحني يارب العباد فقد دقست دقسة السواد والرماد ... ماتجروا ورا الجمال المهم

الرقة والأخلاق والكلام الناعم و ديمة دقاق وأبعدو بعيد من الأستايل الديمة حالن مايل ...

الرمرامة والنضامة[/B]

الرمرامة من يوم ما ولدوها وفوق حجر أمها ختوها تسبح وتنبح لامن يرضعوها ويوم سمايتها كدت العضم

مع ناس أمها وأبوها ويوم عرسها من الأكل قدام الناس منعوها ويوم ماشة بيت راجلها خالتهاوأمها

حذروها لكن ما نفع الكلام تاكل في الضو وفي الضلام وخصوصا ساعة الناس نيام ولو راجلها غلط وضرب

من المكتب قال عايزين شنو؟ تقولو يا سلام يا الرجال الهمام .... عايزين خمسة دجاج وستة أجواز

حمام وما تنسى اللحم المفروم والعادي والريش والكستليتة والاستيك وأغشى المخبز جيب معاك الكيك

والزوج الهمام اللي كان كاتله الغرام كره يومو وندم إنه شافها في يوم من الأيام حسب وضرب وجمع

وطرح لقى الحكاية خربانة والماهية كلها محشورة في بطن فلانة ويا سلام !!!


النضامة

دي يا لطيف كلامة زي مطر الخريف لا يسكت لا يقيف .. أول ما راجلها يفتح الباب ويقول سلام تفتح ماسورة

الكلام ... لا تخلي زيارة سيدة ليها لا أحلام وتنتقل لي قصص الأولاد الحالهم حال الكلاب .. ديل يا يابا

ما بعرفو إلا للخراب نطوا فوق وكسرو الدولاب وبعد شوية تتكلم عن أمها العيانة المشت الإسبتالية

وبعدين غشت الإجزخانة وخالتها التعبانة الجاها السحائي من الحر والسخانة ولا بت عمتها الزهجانة

الراجلها ساقيها من كيعانة ويا سلام !!!!


السجمانة والرمدانة

دي دايما تعبانة ومن حالتها الناس قرفانة ... لا حنة لادخان .... جلابية بلدي وغتاها توب وسخان

لا ريحة زي الناس لا تسرح شعرها زي النسوان .. تجي من الشغل تلاقاها نايمة وفي الحلمة العاشرة

كمان.. ولو لقيتها صاحية تقول ليك الليلة وا لومي ... نايمة فوق نومي لقيت الشغالة الحيوانة

حرقت الطبيخ .. وما عندك حل غير تاكل الفسيخ وتحلي بالبطيخ .. وعشان خاطري ماتزعل زي ما بتلقاه

حتى في المريخ ويا سلام !!!!


الحوامة واللوامة

الحوامة دي دايمة حايمة ولافحة توبها يا عند أهلها يا عند الجيران .. وتخلي ليك الأولاد قاعدين براهم

زي الحملان ... لا قادر عليها ولا ليك عليها سلطان ... ناس الركشة والأمجاد حفظوها وبالمجان شالوها

وين ما تدور ودوها ماأصلها بت أمها وأبوها ويا سلام !!!

اللوامة دي حكايتها حكاية بتضحك الغنماية وتبكي راجلها في يوم السماية ... يوم عيد الحب غلط وجاب

ليها زجاجةعطر وفكر بالليل يفسحها تفسيحة ... أول ما شمته قالت ليه يا راجل يا فضيحة دي موية

ولا ريحة ... وتوبك الجبته لي يوم داك زي الفركة أم صفيحة ... ما شفت راجل سميحة المقرم وفوق دة

كمان تفتيحة وإنت أصلك ما بتسر البال ولا بتسأل عن العيال ويوم داك يوم جوك ناس أمي لا جبت باسطة

لا برتقال .. وأخوك الديمة مكشوف حال .. لا بضرب لا بسأل سؤال ... عشان كتر عنده المال ؟ خلاص نسى

الناس ؟ وبقى عديم إحساس ويا سلام .


الهجامة والرجامة

دي ياساتر يارب ... فاجرة في الخصومة وطول ليلها ونهارها ويومة... فلانة فعلت وفلانة تركت وديك من

بيت أبوها مرقت ...وفلانة يوم السماية سرقت .. وفلتكانة عشان يعرسوها اتعركت واتفركت وفلتكانة ديك

جاها عريس شكله زي ود ابليس وهي لا سمحة لا بتعرف الرقيص ... وبت فلان طلقوها وسلموها امبارح لأمها

وأبوها وود فلان الديمة سجمان ورمدان قالو سقط في الإمتحان ... وبت فلانة الخفيفة اللفيفة أبوها

لا قرش لاتعريفة وتلقاها دايمة كاشخة ونضيفة ويا سلام !!!