من كان منكم بلا خطيئة فليرمها بحجر ... حكمة أضعها دوما نصب عيني لكي لا أضخم أخطاء الآخرين خصوصا
الشباب والشابات لأن العود قد يستقيم عندما يكون أخضرا وغضا أما أخطاء الشياب فلا مجال لغفرانها
فقد قال الشاعر :
سفه الشيخ لا حلم بعده ... ولكن الفتى بعد السفاهة يحلم .
أولا قبل أن أطلق رشاشي طبعا أختكم أوخالتكم متأثرة بمعرض الدفاع الدولي والله جنس أسلحة يا لطيف
كيمائية وجرثومية وصواريخ عابرة للقارات وطيارات بدون طيار لمن قلت لروحي أنا الشلاقة لي شنو
كله سنة أغطي الحدث دة وأخلق موضوع نسائي من مافي بيني وبينكم النسوان حشرن روحن في كله شيء شايلات
الكلاشنكوف وواقفات ولسان حالن بيقول النساء قادمات وبدل حرب النجوم حتقوم حرب الحريم ويا ويلكم
وسواد ليلكم المنتصرات ما حيخلوكم تقعدو والمنهزمات ماراح يعترفن بالهزيمة شفتو ليكم يوم واحدة
ست أدلت بأي اعترافات ... معليش ياجماعة طلعت برة الموضوع أنتو عارفين سلفاإنه أنا أيه؟ إنصرافية
من الدرجة الأولى فسامحوني ما كانش أصدي .
نرجع لموضوعنا الأساسي في ناس بعتقدو إني بجامل الستات على حساب الرجالة أو بمعنى آخر شاطرة في
شرشحتهم وغاضة الطرف عن بنات جنسي لكن والله إنتو ظلمتوني أنا روحي ما برحمها وعشان هيك بقول ليكم
البنات الأيام دي عندهم موضة العريس الإحتياط ومش واحد بس في إتنين كمان قاعدين في الدكة منتظرين
دورهم وما عارفين الحاصل عشان كدة الشعار المرفوع هذه الأيام ( واحد للسف وواحد للف وواحد في
الرف) وأتمنى ما يكون أي واحد فيكم لا للسف ولا للف ولا في الرف وبيني وبينكم الرف أخير من اللف
والسف بتطلع من الرف بأقل الأضرار تانيا في بنات بحبو عشرة أولاد مرة واحدة عشان لو زاغ واحد يكونو
في تسعة في الكيو أو الطابور وكل ما يزوغ واحد يحل محله التاني أصلو مافي مشاعر ولا حب الحكاية
بقت مصلحة ويا حليل أيام زمان الواحدة تحب ليها زول واحد تكنكش فيه لمن تموت وتدسه من الهوا
الطاير ولمن تطلع معاه تطلع بالدس ولو شافها زول بتعرفو بتنتحر أما بنات اليوم الواحدة عينها
مكحلة بالشطة ولو حبت زول تنشره في نشرة ستة وتكلم أهلها وأمها وأبوها وناس الحتة كلهم بكونو
عارفين ولمن تجي طالعة معاه تعمل ضجة إعلامية يا ناس شوفوني عندي موعد غرامي لا حكى لا بقى وفي أقل
مشكلة تخليه زي العجب والرد جاهز غور في ستين داهية مليون واحد عايزني وبعد داك من دا لي دا وفي
الآخر تطلع بقد القفة وتعنس وتتمنى ضل الراجل بدل ضل الحيطة بيني وبينكم الرجال ذاتم بحبو جنس
البنات ديل والرزينات الراسيات بقولو عليهم دمهم تقيل وما ستايل ...
كمان في نوع آخر الله يعزكم ديل بس همهن اللعب بمشاعر الأولاد والضحك عليهم وهاك يا مسجات شعر وغزل
و (send for all) والمسكين يصدق يفتكر روحو أنه الوحيد في عصرو وإنه الحبيب المنتظر في نوع تاني
الله يكرمكم دا ما عنده كلام نظري كله تطبيقي وما سمع ببيت الشعر اللي بيقول لا يسلم الشرف الرفيع
من الأذى حتى يراق على جوانبه الدم ... ديل ما عندهن قشة مرة ما شافن واحد عربيته آخر موديل إلا
أشرن وركبن وما لقن ليهن عربية مدورة وصاحبها مشى يجيب عصير ولا ساندوتش إلا نطن وحرسنو جوة العربية
لمن يتخلع ويقول العربية دي مسكونة ولا شنو تقوم قليلة الحياء تأكد ليه إنها إنسانة بلحمها ودمها
* طيب يا بت الحلال مش كان تستأذني قبلي ما تركبي ؟
_ إنت من زمن الحاجات الأوت أوف ديت دي ياخي خليك راجل ستايل ومواكب الحوادث !( نصف متعلمة )
* يا بت الناس أنا لا مواكب الحوادث ولا الشرق الأوسط إنت بالظبط عايزة شنو؟
- إنت غبي ولا بتتغابى واحدة حلوة زي كدا بتكون عايزة شنو؟
* ( بلغت الروح الحلقوم ) عايزة توصيلة؟ ما عندي مانع بس حلي عن سماي ؟
- أصلي الليلة ما بحل وبمشي معاك محل ما ماشي أها حتسوي شنو؟
* دي مصيبة شنو دي ؟ حتنزلي ولا أجيب البوليس ؟
_ إنت من زمن البوليس جيبه كان جايبه هو ذاتو حيفتح فيك بلاغ ويقول عليك ما راجل !( وقاحة وصفاقة)
واحدة ست كبيرة في العمر وعندها مزاج في الأولاد الصغار كل ما شافت واحد جاتها حالة وشغلت جميع
رادارتها واستخدمت جميع أدوات أنوثتها التي ذهبت مع الريح لجذب الشاب المسكين الحاير الطاير
الما لاقي شغل ليقول لنفسه آخر المطاف وبعد أن فشل في كبح جماحها جرادة في كف ولا ألف طاير .
واحدة أخرى مطلقة من حقها أن تتزوج ولكن ما عايزة واحد في عمرها لازم يكون اصغر منها بعشرة سنين
لشيء في نفس يعقوب ولسوء حظها كل اللي يجيها بكون طمعان في فلوسها وهي كله شيء ولا فلوسها ديل
زي ما بقولو المصريين عض ألبي ولا تعض رغيفي كله شهرين تلاتة أسألها أها العرس متين تقول لي مش
طلع نصاب وحرامي وإبن ستين في سبعين ؟؟؟
خلصنا ياجماعة الخير من ليدز فيرست نجي للرجال اللي في قمة المسئولية وما مالين هدومهم .. ..
ديل يا جماعة شاطرين جدا في شغلهم وليهم وضع أكاديمي ومهني وإجتماعي لكن ما محترمين نفسهم بستغلو
الوضع دا مع النسوان والبنات العايزات شغل خصوصا اللي عندهم مسئولية كبيرة تصورور الرجال ديل من
شدة ما عينهم طايرة مرات الواحد يكون قاعد جوة المكتب وتلاقي عينه حايمة في الكوريدور وما بخجلو
من نفسهم رغم إنهم تجاوزو الخمسين وطبعا حركاتهم دي ما بعملوها الإ مع السودانيات عشان ما ببلغوا
الشرطة أما الجنسيات الأخرى فمجرد معاكسات شفهية أيه الفستان الحلو دة وتنورتك بتجنن ووشك ولا
القمر وحركات من دي كله نظري ولمن السكرتيرة تقول ليه في واحد سوداني عايزك يقول ليها شوفيه
عايز شنو لو قال ليك شغل وديه الخور ولمن تجي واحدة يسألها حلوة ولا بشعة لو كانت السكرتيرة
لبنانية ووحلوة ولا وحشة لو كانت السكرتيرة مصرية وحلوة ولا خسفة لو كانت السكرتيرة إماراتية ,,,
المهم لما يقولو ليه حلوة أو زينة على طول يرش شوية بارفان ويجي يستقبلها من الباب ويطلب من التي
بوي كل أنواع المشروبات وتبدى المعاكسات والوعود وطلب المواعيد خارج مكان العمل لو استجابت
جاءتها الوظيفة على طبق من دهب ولو رفضت تعالو شوفو اللولوة والكذب لمن يجي يوم يقول للسكرتيرة
ما تديني ليها دي واحدة مزعجة وأنا ما فاضي ليها ..
سوداني يمتلك شركة خاصة تعمل عنده واحدة أثيوبية سكرتيرة كانت غاية في الجمال وذات طول فارع ولما
جات سكنت معانا في البناية خلقت بلبلة في الحتة سقط على إثرها آخر الرجال المحترمين المشكلة إنه
المدير دة آخر كبكبة في الأثيوبية يناديها سبب بلا سبب ويغازلها على عينك ياتاجر وغاشيها قال ليها
إنه مامتزوج ولسوء حظه يوم إتصلت زوجته المحذرها ما تتصل في المكتب عشان تقول ليه الولد جرح
أصبعه بالباب ولما سألتها السكرتيرة إنتي منو ؟ قالت ليها أنا المدام راحت السكرتيرة محولة ليه
المكالمة وقالت ليه المدام على التليفون يا سعادة المدير طبعا أسقط في يده ولو قلت ليكم حاجة ما
بتصدقو إنه المدير المقصود كان يسكن في البناية المقابلة لينا و زوجته بتزورني يوميا لأنها ما
شغالة وعندها فراغ عريض فبقيت بين نارين نار الأثيوبية اللي طلعت لي الرجال السودانيين ناس فشنك
وكضابين ونار صاحبتي اللي بتقول لي أبو مروان مافي زيه طبعا أنا بتكلم بالصراحة دي لأنه أبو مروان
وأم مروان ليهم زمن من ما رجعوا السودان وزي ما بقولو سترة وصلحة وفتكم بعافية ...
|
